1
Baaba-ci'e'en nder lenyol Lewi ngari haa Eli'azaaru limanjo e Yosuwa ɓii Nuuna e baaba-ci'e'en nder le'i Isra'iila.
2
Ton haa Silo nder lesdi Kanaana ɓe mbi'i ɓe: “Jawmiraawo umri bee hunnduko Muusa haa min keɓa berniiji haa min njooɗoto e durduɗe ngam dabbaaji amin.”
3
Ngam daliila umroore Jawmiraawo nde'e, Isra'iila'en koo'i berniiji goɗɗi nder geɗe muuɗum'en, ndokki ɗi Lewi'en.
4
Aran ɓe mbaɗi kur'u ngam waŋgingo geɗal ci'e Kahati'en nder lenyol Lewi. Danygol Haruna limanjo heɓi berniiji sappo e tati haa le'i Yahuuda e Simon e Benyamin.
5
Kahati'en luttuɓe keɓi berniiji sappo haa ci'e nder le'i Efrayim e Dan e reeta lenyol Manassa.
6
Danygol Gerson heɓi berniiji sappo e tati haa ci'e nder Issakar e Aser e Neftali e reeta lenyol Manassa nder lesdi Baasan.
7
Danygol Meraari fodde ci'e maagol heɓi berniiji sappo e ɗiɗi haa le'i Ruben e Gada e Zabulon.
8
Bana nii Isra'iila'en ndokki Lewi'en berniiji bee durduɗe maaji. Ɓe ta'ani ɓe ɗi bee waɗugo kur'u, bana Jawmiraawo umruno bee hunnduko Muusa.
9
Ndaa inɗe berniiji ɗi yimɓe le'i Yahuuda e Simeyon ndokki
10
danygol Haruna nder ci'e Kahati'en, Kahat o ɓii Lewi. Kur'u aranu yeɗi ɓe ɗi:
11
Ɓe keɓi Kiriyat-Arba–Arba o baaba Enak–bi'eteeŋgol Heburuun, nder kooseeje Yahuuda, kaŋgol e durduɗe maagol taariiɗe ngol.
12
Ammaa gese berniwol man e gure maagol, ɓe ngeɗno ɗum Kaaleb ɓii Yefunna, ɗum laati maral maako.
13
Danygol Haruna heɓi berniwol Heburuun–kaŋgol woni gootol nder berniiji kisruɗi–e Libna e Yatir e Estemo'a e Holon e Debir e Asan e Yuta e Bayti-Semes, kanji bee durduɗe maaji, ɗum berniiji joweenayi haa le'i Yahuuda e Simon.
14
15
16
17
Haa lenyol Benyamin ɓe keɓi berniiji nayi: Gibiyon e Geba e Anatot e Almon, kanji bee durduɗe maaji.
18
19
Liman'en danygol Haruna keɓi berniiji sappo e tati bee durduɗe maaji.
20
Ci'e Lewi'en luttuɗe nder danygol Kahat, kur'u yeɗi ɓe berniiji goɗɗi nder lesdi Efrayim.
21
Ɓe keɓi berniiji nayi bee durduɗe maaji: Sikem nder kooseeje Efrayim–kaŋgol woni berniwol kisrugol–e Gezer e Kibsayim e Baytihurun.
22
23
Haa lesdi Dan ɓe keɓi berniiji nayi: Elteke e Gibbeton e Ayyalon e Gat-Rimmon, kanji bee durduɗe maaji.
24
25
Haa lesdi reeta lenyol Manassa ɓe keɓi berniiji ɗiɗi: Ta'anak e Yible'am, kanji bee durduɗe maaji.
26
Ci'e luttuɗe nder danygol Kahat keɓi berniiji sappo bee durduɗe maaji.
27
Danygol Gerson ɓii Lewi heɓi berniiji ɗiɗi haa reeta lenyol Manassa: Golan nder lesdi Baasan–kaŋgol woni berniwol kisrugol–e Be'estera, kanji bee durduɗe maaji.
28
Haa lesdi Issakar ɓe keɓi berniiji nayi: Kisiyon e Daberat e Yarmut e En-Gannim, kanji bee durduɗe maaji.
29
30
Haa lesdi Aser ɓe keɓi berniiji nayi: Miseyal e Abdon e Helkat e Rehob, kanji bee durduɗe maaji.
31
32
Haa lesdi Neftali ɓe keɓi berniiji tati: Keedes nder Galiili–kaŋgol woni berniwol kisrugol–e Hammot-Door e Kartan, kanji bee durduɗe maaji.
33
Ci'e Gersoni'en keɓi berniiji sappo e tati bee durduɗe maaji.
34
Ci'e Lewi'en luttuɗe nder danygol Meraari keɓi berniiji nayi haa lesdi Zabulon: Yokne'am e Karta e Rimmona e Nahalal, kanji bee durduɗe maaji.
35
36
Haa lesdi Ruben gaɗa maayo Urdun ɓe keɓi berniiji nayi: Beser haa ƴoolde laddeere tiitotirnde bee Yeriko–kaŋgol woni berniwol kisrugol–e Yahas e Kedemot e Mefa'at, kanji bee durduɗe maaji.
37
38
Haa lesdi Gada ɓe keɓi berniiji nayi: Ramot nder Gile'at e Mahanayim e Hesbon e Ya'ajer, kanji bee durduɗe maaji.
39
40
Ci'e Lewi'en luttuɗe nder danygol Meraari, kur'u yeɗi ɗe berniiji sappo e ɗiɗi.
41
Haa nder maral Isra'iila'en fuu, Lewi'en keɓi berniiji cappanɗe nayi e joweetati bee durduɗe maaji taariiɗe ɗi.
42
43
Bana nii Jawmiraawo hokkiri Isra'iila'en lesdi fuu ndi o hunani baabiraaɓe maɓɓe o hokkan ɓe. Ɓe mari ndi, ɓe njooɗi nder maari.
44
Jawmiraawo hokki ɓe salaaman haa keeri lesdi maɓɓe fuu bana o hunani baabiraaɓe maɓɓe. O hokki ɓe jaalorgal dow konne'en maɓɓe fuu, walaa koo gooto dartani ɓe. O marni ɓe ndi.
45
O gooŋɗini bolle maako booɗɗe fuu ɗe o wolwani Isra'iila.
Fulfulde Bible Adamawa 1994
DEFTERE ALLAH Alliance Biblique du Cameroun, 1994