अउर इ पूरा समइ मँ तू लोग इस्राएल क दूसर लोगन क मदद किह्या ह। तू लोग यहोवा क ओन सबहिं हुकुमन क बहोत ही होसियार स मानइ रह्या, जेनका तोहार परमेस्सर यहोवा तू पचन्क दिहे रहा।
मुला याद राखा कि जउन व्यवस्था मूसा तू पचन्क दिहे अहइ, ओनका माना जात रहइ। तू पचन्क आपन परमेस्सर यहोवा स पिरेम करब अउ ओकरे हुकुमन क मानइ क अहइ। तू पचन्क ओनके पाछे चलइ चाही, अउर पूरी आस्था क साथ ओनकर सेवा करा।”
मूसा आधा मनस्से परिवार समूह क बासान प्रदेस दिहे रहा। यहोसू दूसर आधा मनस्से परिवार समूह क यरदन नदी क पच्छिम मँ प्रदेस दिहस। यहोसू ओनका आपन घरे पठएसा यहोसू ओनका आसीर्बाद दिहस।
उ कहेस, “तू पचे बहोत सम्पन्न अहा। तोहरे पचन्क लगे चाँदी, सोना अउर दूसर बहुमूल्य जेवरन क संग बहोत स जनावर अहइँ। तू लोगन क लगे अनेक सुन्नर वस्त्र अहइँ। तू पचे आपन दुस्मनन स बहोत स चिजियन लिह्या ह। ऍन चिजियन क तू पचन्क आपुस मँ बाँट लेइ चाही। अब आपन-आपन घरे जा।”
ऍह बरे इस्राएल क मनइयन कछू लोगन क रूबेन अउर गाद क परिवार समूह अउ मनस्से क आधा परिवार समूह क लोगन स बातन करइ बरे पठएन। इस्राएल क लोग प्रमुख याजक जउन कि एलीआज़र क पूत पीनहास रहा क बात पइ चर्चा करइ बरे पठाएस।
पोर नाउँ क जगह क याद करा। हम लोग पाप क कारण अबहुँ कस्ट सहित ह। इ बड़के पाप बरे परमेस्सर इस्राएल क बहोत स लोगन क बुरी तरह बीमार कइ दिहे रहा अउर हम लोग अबहुँ उ बेरामी क कारण कस्ट सहत अही।
अउर अब तू पचे उहइ करत अहा। तउ पचे यहोवा क विरुद्ध जात बाट्या। का तू पचे यहोवा क हुकुम क मानइ स मना करब्या? अगर तू पचे जउन करत अहा, बन्द नाहीं करत्या तउ यहोवा इस्राएल क हर मनई प कोहाइ जाइ।
“हमार परमेस्सर यहोवा अहइ। हम लोग फुन दोहरावत अही कि हमार परमेस्सर यहोवा अहइ अउर परमेस्सर जानत ह कि तू लोग भी इ जाना। तू लोग ओकर फइसला कइ सकत अहा जउन हम लोग किहे अही। अगर तू लोगन क इ बिस्सास अहइ कि हम लोग पाप किहे अही तउ तू लोग हम पचन्क अबहिं मार सकत ह।
अगर हम पचे परमेस्सर क नेम तोड़े अही तु हम कहब कि यहोवा खुद हमका सजा देइ। का तू लोग इ सोचत अहा कि हम लोग इ वेदी क होमबलि चढ़ावइ अउर अन्नबलि अउर मेलबलि चटावइ बरे बनावा ह
नाहीं। हम लोग ऍका इ उदेस्य स नाहीं बनावा ह। हम लोग इ वेदी काहे बनावा ह? हम पचन्क डर रहा कि भविस्स मँ तोहार सबन्क लोग हम पचन्क आपन रास्ट्र क एक ठु हींसा नाहीं समुझिहीं। तब तोहरे लोग इ कहिहीं, ‘तू लोग इस्राएल क परमेस्सर यहोवा क उपासना नाहीं कइ सकत्या।
परमेस्सर हम लोगन्क यरदन नदी क दूसर कइँती प्रदेस दिहे अहइ। एकर अरथ इ भवा कि यरदन नदी क सीमा बनावा ह। हमका डर अहइ कि जब तोहरे पचन्क गदेलन बड़ा होइके इ प्रदेस पइ सासन करिहीं तब उ पचे हमका बिसरि जइहीं, कि हम भी तोहार लोग अही। उ पचे हमसे कहिहीं, हे रूबेन अउर गाद क परिवार समूह, तू पचे इस्राएल क हींसा नाहीं अहा!’ तब तोहार संतानन हमरे संतानन क यहोवा क उपासना करइ स रोकिहीं।
हम पचे जउने सच्चे उद्धेस्य बरे वेदी बनाए रहे, उ आपन लोगन क सिरिफ देखाउब रहा कि हम पचे उ परमेस्सर क उपासना करित ह जेकर तू लोग उपासना करत अहा। इ वेदी तोहरे पचन बरे, हम लोगन बरे अउर भविस्स मँ हम लोगन क गदेलन बरे इ बात क प्रमाण होइ कि हम लोग परमेस्सर क उपासना करित ह। हम लोग यहोवा क बलियन, अन्नबलि अउ मेलबलि चड़ाइत ह। हम पचे चाहत रहे कि तोहार गदेलन बड़इँ अउर जान लेइँ कि हम लोग भी तोहरी तरह इस्राएल क मनई अही।
भविस्स मँ अगर अइसा होत ह कि तोहार गदेलन कहइँ, ‘हम लोग इस्राएल स सम्बंध नाहीं रखित तउ हमार गदेलन तब कहि सकिहीं कि होसियारी स धियान देइँ कि हमार पुरखन, जउन हम पचन स पहिले रहेन, एक ठु वेदी बनाइ रहेन। इ वेदी ठीक वइसे ही अहइ जइसी पवित्तर तम्बू क समन्वा यहोवा क वेदी अहइ। हम लोग इ वेदी क उपयोग बलि देइ बरे नाहीं करत। मुला इ बाने क संकेत करत ह कि हम लोग इस्राएल क एक हींसा अही।’
“फुरे तउ इ अहइ कि हम लोग यहोवा क खिलाफ नाहीं होइ चाहित। हम लोग अब ओकर अनुसरण करब तजि देइ नाहीं चाहित। हम लोग जानत अही कि एक मात्र सच्ची वेदी उहइ अहइ जउन पवित्तर तम्बू क समन्वा अहइ। उ वेदी, हमरे परमेस्सर यहोवा क अहइ।”
ऍह बरे एलीआजार क पूत याजक पीनहास कहेस, “अब हम लोग समुझत अही कि यहोवा हमरे संग अहइ अउर हम लोग जानत अही कि तू पचन मँ स कउनो भी ओकरे खिलाफ नाहीं गवा अहा। हम लोग खुस अही कि इस्राएल क लोगन क यहोवा स सजा नाहीं मिली।”