Ade, m kõ-y-la wala y zu-noog pʋɩɩre, tẽns niyns y sẽn bas n pa wã wã, wala tẽns niyns m sẽn menes b nebã zãnga, Zʋrdẽ kʋɩlg n ta Mog kãsenga, wĩndga sẽn lʋɩtẽ.
Da saag-y n fãoog y mense ne buud a taba sẽn ket n vɩ-b yãmb sɛɛgẽ wã ye. Da pʋd-y b wẽn-naandsa yʋʋre, da wẽen-y ne bãmba, da pʋg-y-ba, da wõgemd-y b taoor ye.
bãng-y tɩ wakat kãng tɛka Soaala, yãmb Wẽnnaam, kõn le rig-b yãmb taoor ye. La yãmb yĩnga b na lebga tãooga, n lebg bẽdgo, n lebg sãbsga y lugẽ, n lebg gõaag y nini al tɩ y wa tol n menem zãng, tẽn-sõng ning Soaala-Wẽnnaam sẽn kõ yãmba.
M ka na n kaoos la m yi moog ye. Na n yɩɩ rũnna bala. Deeg-y y sũurẽ la y yamẽ tɩ kãab nood niyns Soaala, yãmb Wẽnnaam, sẽn kãab yãmba, ka pa vɩɩd ye. Ba a ye ka pa n ka pids ye.
Sɩda, yãmb sã n sãam zood ning b sẽn yõg ne yãmbã, y sã n pʋg wẽn-naandsã, y sã n wõgemd b taoore, Soaala, yãmb Wẽnnaam, sũur na n puuga ne yã la y kõn kaoos n menem n zãag ne tẽn-sõng ning b sẽn kõ yãmba ye.»