Kiiyum anyun Josua bororiosiek tugul che bo Israel koba Sekem, ak kiguur boisiekab Israel, ak bounikwak, ak kiruogikwak, ak kiptainikwak; ak kitononso eng’ taitab Kamuktaindet.
Ak kilenji Josua bik tugul, Kamwa ko u ni Jehovah Kamuktaindetab Israel, kole, Kimenyei kwanisiekwok keny Ainet bitonin, Tera, kwandab Abraham, ak ko kwandab Nahor: ak kiotei kanamonik.
Kiamutu kwanisiekwok komong’une Misri: ak kiobwa agoi nyanjet; ak kion Misrik kwanisiekwok eng’ karisiek ak bik che lanyei mbartanyisiek kot koit Nyanjet ne Birir.
Ak kingorirji Jehovah, konde mesundeito kwenung’wong’ ak Misrik, ak koib nyanjet komaluuch ichek ak kotuch; ak kigeer konyekwok kit ne kiayai eng’ Misri: ak kiomeny ong’atet betusiek che chang’.
Ak kiamutwok oitu emetab Amorik, che kimenyei Jordan bitonin; ak kiyai luget ak okwek: ak kiande icheget eunekwok; ak kionam emenywa kobunujok; ak kiabar ichek eng’ taing’wong’.
Ak kiolong’une Jordan, obwa Jeriko: ak kiyai luget ak okwek bikab Jeriko, Amorik, Perisik, Kananik, Hitik, Girgasik, Hibik, ak Jebusik; ak kiande ichek eunekwok.
Oiywei anyun Jehovah, ak oboisiechi inendet eng’ muguleldo ne matinyei kenisiet ak eng’ imanit: ak oiste kanamonik che kiotei kwanisiekwok eng’ Ainet bitonin, ak eng’ Misri; ak oboisiechi Jehovah.
Ak ngot ogeere ko ya oboisiechini Jehovah, olewen rani ne oboisiechini; ngo kanamonik che kiotei kwanisiekwok eng’ Ainet bitonin, anan kanamonikab Amorik, che omenye emenywa: ago aboisiechini ane Jehovah, koboto gonnyu.
amu Jehovah Kamuktaindennyo, inendet ne kiimutwech ak kwanisiekyok kemong’une emetab Misri, eng’ gotab otwognatet, ak ko inendet ne kiyai kaborunoichu ki eechen eng’ tainnyo, ak koribonwech eng’ oret tugul ne kigibunu, ak eng’ kwenutab bik tugul che kigibunu kwenunywa:
Ak kilenji Josua bik, Momuchi oboisiechi Jehovah; amu inendet ko Kamuktaindet ne tilil; inendet ko Kamuktaindet ne amei ng’etkong’; manyoiywok kaat bistoeng’wong’ anan ko tengekwogikwok.
Ak kisir ng’alechuto Josua eng’ bukuitab Ng’atutikab Kamuktaindet; ak kiinem koita ne o, ak konde kotonon eng’ ketit kel ne kimi ye bo ole tilil ne bo Jehovah.
Ak kiboisiechi Israel Jehovah eng’ betusiek tugul che bo Josua, ak eng’ betusiek tugul che bo boisiek che kita komi ko kagome Josua, che kiingen boisiet tugul ne bo Jehovah, ne kiga koyai agobo Israel.
Ak kitub ichek kowekab Josep eng’ Sekem, che kiibu lagokab Israel eng’ Misri, eng’ kebebertab emet ne kiga al Jakobo eng’ werikab Hamor kwandab Sekem eng’ fedaisiek bogol: ak kiek choto borotetab lagokab Josep.