Ki iyum anyun `Joshua pororyosyek tugul che po Israel koba Shekem, ak koguur poisyegap Israel, pounikwak, kirwoogikwak ak kiptainikwak. Ki pwa anyun ak kotononso eng' taitap Kamuktaindet.
Yeityo kong'alaal `Joshua ak koleenji piik tugul, “Kamwa ko uu ni Kamuktaindet ne Toroor, Kamuktaindetap Israel kole, Ki menyei kwanisyekwok keny aineet pitoniin; che icheeget ko Tera kwandap Abraham ak kwandap Nahor ak kiotei kanamonik.
Yeityo anyun amutu kwanisyekwok komang'une Misiri ak ki obwa agoi nyanjet. Ki oon Misiriik kwanisyekwok eng' kariisyek ak piik che ketei paraisisyek kot koit Araraita ne Piriir.
Kingo riirchi Kamuktaindet ne Toroor konde mesundeito kwenung'wong' ak Misiriik ak koip nyanjet komaaluuch icheek ak kotuch. Ki keer iman konyekwok kiit ne ki ayai eng' Misiri. Eng' let ko ki omeny surkwen peetuusyek che chaang'.
Yeityo amutwak oitu emetap Amorik che ki menyei Jordan pitoniin. Ki yai lugeet ak okweek ak ki ande icheeget eunekwok ak ki onam emennywa kobunjook, ak ki abar icheek eng' taing'wong'.
Ki olong'une `Jordan obwa Jeriko ak ki yai lugeet ak okweek piigap Jeriko, Amorik, Perisik, Kanaanik, Hitik, Girgasik, Hibik ak Jebusik, ak ki ande icheek eunekwok.
“Oiywei anyun Kamuktaindet ne Toroor ak oboisyechi ineendet eng' muguleldo ne ma tinyei keniisyet ak eng' imanit. Oiste kanamonik che kiotei kwanisyekwok eng' aineet pitoniin ak eng' Misiri, ak oboisyechi Kamuktaindet ne Toroor.
Ago ngot ogeere ko ya oboisyechini Kamuktaindet ne Toroor, olewen rani ne oboisyechini; ngo kanamonik che kiotei kwanisyekwok eng' aineet pitoniin anan kanamonigap Amorik che omenye emennywa; ago aboisyechini anee ak koonnyu Kamuktaindet ne Toroor.”
Amu Kamuktaindet ne Toroor, Kamuktaindennyo, ko ineendet ne ki imutwech ak kwanisyekyok kemang'une emetap Misiri eng' kootap otwoknateet ak ko ineendet ne ki yai kaboorunoichu kieechen eng' tainnyo ak koriibonwech eng' ooreet tugul ne ki kibunu ak eng' kwenutap piik tugul che ki kibunu kwenunnywa.
Ki oon `Kamuktaindet ne Toroor piik tugul koba eng' tainnyo, chooto Amorik che ki menyei emoniito. Nooto anyun kiboisyechini Kamuktaindet ne Toroor agacheek, amu ineendet ko Kamuktaindennyo.”
Koleenji `Joshua piik, “Momuuchi oboisyechi Kamuktaindet ne Toroor, amu ineendet ko Kamuktaindet ne Toroor ne tiliil. Ineendet ko Kamuktaindet ne Toroor ne amei ng'etkong'; ma nyoiywok kaat eng' pistoeng'wong' anan ko eng' tengekwogikwok.
Ki sir ng'aleechuuto `Joshua eng' bukuitap ng'atuutigap Kamuktaindet. Ki inem koita ne oo ak konde kotonon eng' keetitap alayet keel ne ki mi ye po ole-tiliil ne po Kamuktaindet ne Toroor.
Kiboisyechi Israel Kamuktaindet ne Toroor eng' peetuusyek tugul che po Joshua ak eng' peetuusyek tugul che po poisyek che kita komi ko kagome Joshua, che ki ingen poisyet tugul ne po Kamuktaindet ne Toroor ne kiga koyai agobo Israel.
Kitup icheek kawegap Joseph eng' Shekem che ki ibu piigap Israel eng' Misiri eng' kebebertap emet ne kigaal Jakobo eng' weeriigap Hamor kwandap Shekem eng' fedhaisyek pogol, ak ki ek chooto poroteetap lagogap Joseph.