nga balangirira eri abantu nti: “Bwe mulaba Ssanduuku y'Endagaano y'Omukama Katonda wammwe ne bakabona Abaleevi nga bagisitudde, nammwe olwo nga muva mu bifo byammwe, nga mugigoberera,
Omukama n'agamba Yoswa nti: “Ntandise n'olwa leero luno okukugulumiza mu maaso ga Yisirayeli yenna, bamanye nti nga bwe nabeeranga ne Musa, bwe ndi naawe.
N'ayongera nti: “Ku kino kwe munaamanyira nga Katonda omulamu ali mu makkati gammwe, nti ddala agenda kubagoberawo mu maaso gammwe Abakanaani, Abakitti, Abakivi, Abaperizzi, Abagirugasi, Abaamori n'Abayebusi.
Bakabona abasitudde Ssanduuku bwe baatuuka ku Yorudani, olwalinnya amala g'ebigere byabwe bati ku lubalama lw'amazzi, [Yorudani guba gwaladde ku lubalama lwagwo lwonna mu budde bwonna obw'amakungula],
amazzi ag'engulu ne galekeraawo okukulukuta, ne geetuuma ng'entuumu wala nnyo awali ekibuga Adamu ekiri okumpi ne Zaretani; naye go amazzi ag'emmanga agakkirira mu nnyanja ya Araba, kwe kugamba nti Ennyanja ey'Omunnyo, ne gasalirwako ddala. Abantu ne basomoka nga boolekedde Yeriko.
Bakabona abaali beetisse Ssanduuku y'Endagaano ey'Omukama, ne bayimirira ku ttaka nga kkalu mu makkati ga Yorudani, okutuusa ng'abantu bonna bamaze okukutula Yorudani ku ttaka ekkalu.