obalagire mu makkati ga Yorudani, wennyini bakabona we bayimiridde, baggyewo amayinja kkumi n'abiri, mugende nago, mugateeke mu kifo we munaasula ekiro kino.”
Abayisirayeli ne bakola nga Yoswa bwe yabalagira. Ne baggya amayinja kkumi n'abiri mu makkati ga Yorudani, okwenkanankana omuwendo gw'ebika bya Yisirayeli, ng'Omukama bwe yali alagidde Yoswa, ne bagatwala okutuuka mu kifo we baasula, ne bagassa awo.
Ne Yoswa n'asimba amayinja kkumi n'abiri mu makkati ga Yorudani mu kifo bakabona abaali batwala Ssanduuku y'Endagaano we baali bayimiridde; gakyaliyo n'okutuusa ku lunaku lwa leero.
Bakabona abaali batwala Ssanduuku baasigalira ddala mu makkati ga Yorudani okutuusa nga byonna Omukama bye yagamba omuweereza we Yoswa abantu babituukirizza, era nga Musa bwe yali alagidde Yoswa. N'abantu ne banguwa, ne basomoka.
Bazzukulu ba Rubeni, aba Gaadi n'ekyokubiri ky'ekika kya Manasse nga babagalidde ebyokulwanyisa baasomoka nga bakulembeddemu Abayisirayeli, nga Musa bwe yali abalagidde.
Bwe baayambuka nga beetisse Ssanduuku y'Endagaano y'Omukama, bakabona olwassa bati ekigere ku lukalu, amazzi ne gadda mu kifo kyago, ne gakulukuta nga mu masooka, nga gaaladde ku mbalama zaago zonna.
Ku lunaku olw'ekkumi olw'omwezi omubereberye abantu ne basitula okuva ku Yorudani, ne bambuka, ne basiisira e Gilugali, ku njegooyego za Yeriko ebuvanjuba.
Kubanga Omukama Katonda wammwe yakaliza amazzi ga Yorudani mu maaso gammwe, okutuusa lwe mwasomoka, nga bwe yakola luli ku Nnyanja ey'Ebiwuuwa, gye yakaliza mu maaso gaffe okutuusa nga tusomose.