Na lūūlū pye a batemi ba Baamooli a ba kū nkīlo gwa ng'weli ya mongo gwa Yolodani, na a batemi ba Bakanaani a bose abo baalī kū ng'hilimva ya nyanza aho bigwa gīkī ū SEEBA wagūkamije ū mongo gwa Yolodani kūlwa nguno ya Baisilaeli, kūshisha tūūkīla pye a bose, ī ng'holò jabo jikahaahūka, būgayiwa gete ī nguzu ja kūmanhya na a Baisilaeli.
Ū Yoshwa akabasaala kūlwa nguno ya gīkī, pye abo baalī bafuma mu sī ya Misili, a bagosha ba myaka ya kūdūla kūja kū būlūgū, bakachīla ng'witogolo aho balī mu nzīla balīfuma ī Misili.
Ha ntondo ya lūshikū lwa Pasaka, ū lūshikū lwenūlo, būlya matwajo gamò na gamò ga mu sī yenīyo; migatī ītī na shibimbya, hamò na shilīwa sha būkalange.
Hūna ī eemanu yooya ū kwilonga kwīngīīla ha ntondo yaho, a ha ntondo ya lūshikū lwa kūshilya ī shilwa sha mu sī yenīyo. Kwīngīīla ikanza lyenīlo a Baisilaeli bataliile eemanu hangī, gwike ū ng'waka gwenūyo būlya sha kūfuma mu matwajo ga mu sī ya Kanaani.