×

現代台語譯本漢字版

約書亞記 6

1
耶利哥 的城門,因為 以色列 人的緣故關牢牢,無人出入。
2
上主對 約書亞 講:「你看,我已經將 耶利哥 及伊的王,伊強猛的勇士,攏交佇你的手。
3
恁所有的戰士著踅此個城,一日一遍,踅六日;
4
七個祭司著攑七支羊角的哨角行佇約櫃的頭前;到第七日,恁著踅城七遍,祭司嘛著歕哨角。
5
恁一下聽著哨角拖長的聲,所有的人著大聲喝,城牆就會倒甲平平平,逐個人攏著繼續進前,衝入城。」
6
嫩 的子 約書亞 召集祭司,對𪜶講:「恁著扛約櫃,七個祭司攑七支羊角的哨角,行佇上主約櫃的頭前。」
7
伊閣給人民講:「恁著進前去踅城,帶軍器的著行佇上主約櫃的頭前。」
8
約書亞 對人民講煞,七個祭司攑七支羊角的哨角,行佇上主的面前歕哨角;上主的約櫃隨佇𪜶的後面。
9
帶軍器的先鋒隊行佇歕哨角的祭司頭前,後隊隨約櫃行;祭司那行那歕哨角。
10
約書亞 命令人民,講:「恁毋通喝,毋通互人聽著恁的聲,連一句都毋通喝出嘴,聽候我吩咐恁喝的時,恁才通喝。」
11
按呢, 約書亞 互上主的約櫃踅城踅一輪;然後,𪜶倒來營地歇暝。
12
約書亞 透早起來,祭司閣扛上主的約櫃。
13
攑羊角的哨角的七個祭司,行佇上主約櫃的頭前歕哨角;帶軍器的先鋒隊行佇祭司的頭前,後隊隨佇上主約櫃的後面,祭司那行那歕哨角。
14
第二日𪜶嘛踅城踅一輪,然後倒來營地。六日攏按呢做。
15
第七日天昲光的時,𪜶就起來,照仝款的方式踅城,毋拘此日踅城踅七輪。
16
到第七遍,祭司歕哨角的時, 約書亞 對人民講:「著大聲喝,因為上主已經將此個城交互恁啦!
17
此個城及內面所有的,攏著完全毀滅獻互上主;只有娼妓 喇合 ,以及所有𫢶佇伊厝內的人,著留𪜶的性命;因為伊有藏咱派去的偵探。
18
恁著謹慎,毋通提應該毀滅的物,才免恁受咒詛;恁若提應該毀滅的物, 以色列 全營就會成做應該毀滅的,惹起災禍。
19
毋拘金、銀,以及銅及鐵的器具,攏著分別作聖歸互上主,收入上主的府庫。」
20
人民就大聲喝,祭司歕哨角。人民聽著哨角的聲,就閣較大聲喝,城牆就倒甲平平平,人民就衝入去,奪取彼個城。
21
人民將城內所有的,無論男婦老幼、牛、羊,及驢,全部用刀給𪜶消滅。
22
約書亞 給彼兩個探查彼個地的人講:「恁入去彼個娼妓的厝,照恁對伊咒誓的,導彼個婦仁人及所有屬伊的人出來。」
23
彼兩個做偵探的少年人就入去,導 喇合 及伊的老父老母、兄弟姊妹,以及所有屬伊的人出來。𪜶給 喇合 的親成攏導出來住佇 以色列 的營外。
24
以色列 人就用火燒彼個城及內面所有的;毋拘金、銀,以及銅及鐵的器具,攏收入佇上主厝內的府庫。
25
約書亞 保全娼妓 喇合 、伊的老父的家屬,及所有屬伊的人的性命。𪜶就住佇 以色列 人中間到今仔日,因為 喇合 有藏 約書亞 派來探查 耶利哥 的偵探。
26
彼時, 約書亞 咒誓警告講:「若有人重建 耶利哥 城,會受上主咒詛: 下地基的時,會死大子; 安城門的時,會死煞尾子。」
27
上主及 約書亞 同在; 約書亞 的名聲傳遍全地。
Chinese TTVH 2021
The Bible Society in Taiwan, 2021
:
保存笔记