Kake etigila apa iltung'ana le Israel enkirukoto tialo nena tokitin apa naaiteng'elaki; amu ore Akan olayioni le Karmi, olayioni le Sabdi, olayioni le Sera lo losho le Yuda newa embata e nena tokitin apa naaiteng'elaki; neyupuyup engoro o Laitoriani te nkaraki iltung'ana le Israel.
Neirriwaa Yoshua iltung'ana te Yeriko meshomo enkang e Ai, apa nataaniki Bet-afen, enkalo e nkilepunoto e nkolong e Betel, nejoki ninche, Elepa enchom enkitalana enkop. Neilep iltung'ana aapuo aaikitalan Ai.
nesesekuan iltung'ana le Ai iltung'ana oobaya tomoni uni o ile lenye, nemiraa ninche te kishomi o meitabaiki Shebarim, nesesekuan ninche to loshong'ishong'i nelepori iltauja loo ltung'ana netiu anaa enkare.
Nepolos Yoshua inkilani enyena nebatatakino enkop te nkomom enye te dukuya ilo sanduku lo Laitoriani ometaba anaa neaku teipa, ninye te nebo ilpayiani le Israel; nepik enterit ilukuny enye.
Neaku meidim iltung'ana le Israel aaitasheiki ilmang'ati lenye, eibelekenyate ninche aaisho inkoriong'i ilmang'ati lenye, te nkaraki nataa ninche entoki e nkidaata. Maitoki aikata nanu aaku te nebo iyie, aashu ake ti nindaikie nena tokitin apa naaiteng'elaki aitung'uaa atua intae.
Tudumunye, intisinya iltung'ana, nijoki, Entisinya ate te nkaraki taaisere, amu nji ejo Olaitoriani, Enkai e Israel, Intokitin apa naaiteng'elaki kuna naatii atua intae, Israel; mindim iyie aitasho te dukuya ilmang'ati, linono o metaba anaa nintayu nena tokitin apa naaiteng'elaki aiwuang'ie tiatua iyie.”
“Naa ore ilo otumi eeta nena tokitin apa naaiteng'elaki nepejori te nkima, ninye o ntokitin pooki naata ninye, te nkaraki natigila ninye olning'o lo Laitoriani, o te nkaraki nataasa ninye embae e sulare tiatua Israel.”
Ore Yoshua o Siraeli pooki ootii te nebo ninye neya Akan olayioni le Sera o enkosholai o lkila o ilo belati le saabu o layiok lenyena o ntoyie enyena o lmong'i lenyena o sirkon lenyena o nkerra o lng'obor lenye o pooki toki apa naata ninye; neyauni ninche oerata le Akori.
Nesot ninche te shumata ninye enkurare kitok too soito leton etii o metabaiki ena olong neborru taa Olaitoriani teina goro enye nayupuyup. Neaku ore ebaiki ena olong ore enkarna e ine wueji naa keji oerata le Akori.