Israyɛl kamba tõdgame n dɩk bũmb dɩkr sẽn lebg kisgu. A Akã n dɩk sẽn kisã tɩ Soaala-Wẽnd sũur puugi ne Israyɛl kamba. A Akã yaa a Karmi biiga, t'a Karmi ba yaa a Zabdi, t'a Zabdi yaa a Zera biiga, a Zɩɩda roogẽ.
B sẽn lɛɛg n wa b yeela a Zozuwe: «Ka modgre tɩ neba fãa kẽng n tɩ tak zabr ye. Neb tus a tã bɩ a naas bal tõe n sekame. Ka modgre tɩ neba fãa nams n kẽng ye, Ayi rãmb sõora paooda wʋsgo.»
Ayi rãmba tol n paama neb pis-tã la a yoobe n kʋ, n dig sẽn kell-bã, al tẽnga noorẽ kʋɩlense, n ta Sebarim. Yaa b sẽn wa n lɛɛg n sigdã la Ayi rãmb kʋ-ba. Israyɛl kamba wʋmame tɩ b sũur bondg zãnga.
Sũ-sãang kɩtame t'a Zozuwe kẽes a futu la a lʋɩ-la a yãvabg, kuga walsa koglga taoore, n pa be tɩ wĩndig wa kẽ. Nin-kẽemba me maana wa yẽnda; b fãa wʋka tom n yug b zutu.
A Zozuwe ra yetame: «Kato, Soaala-Wẽnde, bõe yĩng la yãmb bas y nebã tɩ b rʋʋg Zʋrdẽ n na n lʋɩ Amoritsa nugẽ, n ki? Tõnd n kos n na n kẽe Zʋrdẽ rʋʋnd bɩ?
Kanaã rãmba la b yagse na wʋmame, b na n sũu taaba n tak zabr ne do la b na n menesa d yʋʋr tẽng zugu. Bõe la y na n maan n le maneg y yʋʋra sẽn tog ne pẽgr kãsengã, Soaala?»
Yiki, Zozuwe, yɩlg f neba. F na n yeelame: ‹Yɩlg-y mens beoog yĩnga tɩ Soaala, Israyɛl Wẽndã, gomda woto: Tʋʋmd wẽng n tʋm y sʋka, Israyɛl kamba, la y kõn tõog n yals y bɛɛba taoore y sã n ka reng n yiis kisgã y sʋk ye.›
Dɩlla beoog yibeoogo bɩ y wa roog-roogo. Roog ninga Soaala-Wẽnd sẽn na n paalg a soaba na n waa sak-saka. Sak ninga Soaala-Wẽnd sẽn na n paalg a soaba na n waa zak-zaka. Zak ning Soaala-Wẽnd sẽn na paalg a soaba na n waa nin-yend, nin-yende.
B sẽn na n mik bũmb ning rɩkr sẽn kisa ned ning teedẽ, b yõogda a soab bugmẽ, yẽnda ne a sẽn so fãa, t'a sãama Soaala-Wẽnd zoodo, n maan wɩɩbdo, Israyɛl tẽmpeelmẽ.»
M yãenda bɛɛba laog sʋka, Sinear fu yorg neer gɩfẽ, wanzurf zɩslem sẽn ta wakɩ koeems kobs-yi rẽnna la sãnem gilgu zɩslem sẽn ta wakɩ keems pis-nu rẽnna. Raab wẽng wala m yamẽ tɩ m dɩk-ba. M solga fãa bokẽ, m doog tẽnsʋka.»
B talla a Zera biig a Akã n looge, yẽ ne wanzurfã, ne fu-yorgã la sãnem gilgã, n paas a kom-dibli la a kom-pugli, a loalga, a bõanga, a rũm bõonese, a rooga raad la pɛɛla la a sẽn da so fãa. Israyɛl zãma wã fãa yãag-a lame n tees Akor weoogo.
B wʋka kug zembala n sam a zugu la kuga saongã keta ne rũnna. Yaa rẽ yĩng me la b pʋd zĩigã tɩ Akor, zu-beed tẽnga, la b ket n boond-a-la boto al ne rũnna. Dẽ marsã la Soaala-Wẽnd sũura maag yã.