Puãi va Isareli va lueya kondaka yovina via siñaliwa, momo Akani, omõla a Karimi, omõla a Savidi, omõla a Sera, wokepata lia Yuda, wa kuata kovina via siñaliwa, kuenje onyeño ya Yehova ya wengukila va Isareli.
Yehosua wa tuma alume, va tunda ko Yeriko ha va endi ko Hai, yi lisungue la Betavene, kutundilo wa Betele, yu wa popia lavo hati, Kuendi, kũlĩhisi ofeka. Oco alume va enda kuenje va kũlĩhisa Hai.
Va tiuka ku Yehosua, yu va popia laye vati, Omanu ka va ka ende vosi, puãi ku ende ño olohũlũkai vivali pamue olohũlũkai vitatu vialume ha va yuli Hai. Ku ka kavise ño omanu vosi oku lamanelako, momo va Hai ka va luile.
Alume va Hai va ipapo ca soka akui atatu lepandu kalume. Va va lupuisa tunde kombundi toke ko Sevari. Va va ipãila vociloka. Oco ovitima viomanu via yenguluka, via linga ndovava.
Yehosua wa tola uwalo waye, wa tuvika ocipala caye posi kovaso yocikasa ca Yehova, toke koñolosi, eye kumue lakulu va Isareli. Va litaila eve kovitue viavo.
Yehosua wa popia hati, Avoyo we, a Yehova Suku! Nye wa yokisila omanu ava Yordão, hu tu eci peka lia va Amori loku tu takisa? Nda tua sanjukilile ño oku tumala sinya olio lia Yordão, nda hĩse.
Momo va Kanana lava vosi va tunga vofeka va laika oku ci yeva, kuenje va tu ñuala ocingonja loku kungula onduko yetu kilu lieve. Onduko yove yinene, lacimue hẽ o yi lingila?
Va Isareli va linga ekandu. Ocili muẽle, ocisila cange nda va handelekele, va vi lueya. Ocili va kuata kovina via siñaliwa, kuenda va iva, va limbika, yu va vi yombeka muẽle pokati kovikuata viavo.
Oco va Isareli ka va tela oku tamalala lovanyali vavo, puãi vaimba onyima ovanyali vavo, momo esiñalo lia va veta, Si kala vali lene, te nda vu nyola ovina via siñaliwa vi kasi pokati kene.
Votoka, yelisa omanu, popia huti, Liyelisili eteke lia hẽla. Momo ca popia Yehova Suku ya Isareli, ceci, hati, A va Isareli, pokati kene pali cimue ca siñaliwa. Ko tela oku tamalala lovanyali vene, te nda vu tundisa pokati kene eci ca siñaliwa.
Kuenje u o sangiwa leci ca siñaliwa o yokiwa londalu, eye kumue leci cosi a kuete. Momo wa lueyela ocisila ca Yehova kuenda wa linga ekutisasõi kIsareli.
Yehosua kumue la va Isareli vosi, va kuata Akani omõla a Sera, lopalata yaco, lokapote, locinimbu culu, lomala vaye valume, lomala vaye vakãi, lolongombe viaye, lovimbulu viaye, lolomeme viaye, lombalaka yaye, leci cosi a kala laco. Va enda lavio kocimbota ca Akore.
Va lundika ondunda yinene yovawe, haiko yi kasi toke etaili lilo. Kuenje Yehova wa liweka konyeño yaye ya tokota. Oco toke etaili lilo ocitumãlo caco va ci tukola vati, Ocimbota ca Akore.