Masacɛ minw bɛɛ tun be Zurudɛn baji faan dɔ la kuluyɔrɔw ni kulujukɔrɔ mara la, ani minw tun be kɔgɔjida la fɔɔ ka taga se Liban gɛrɛfɛ, minw ye itiw ni amoriw ani kanaanw ni periziw ani iviw ni zebuziw ka masacɛw ye, olu y'o koow kibaru mɛn.
U tagara Zozuwe ni Isirayɛlidenw fɛ u sigiyɔrɔ la Giligali k'a fɔ u ye ko: «An bɔra jamana dɔ la min yɔrɔ ka jan, an b'a ɲini i fɛ, i ka to an be bɛn.»
A ye amoriw ka masacɛ fila nunu kɛ cogo min na Zurudɛn baji kɔfɛ, an y'o mɛn, minw ye Ɛsibɔn masacɛ Siyɔn ye, ni * Basan masacɛ Ɔgi, min tun be Asitarɔti.
O la, an ka cɛkɔrɔbaw ni an ka jamanadenw bɛɛ y'a fɔ an ye ko an ka sira kan dumuni ta ka na aw fɛ, k'a fɔ aw ye ko an kɛra aw ta ye, ko aw ka bɛn n'an ye.
U ye Zozuwe jaabi ko: «Masaba e ka Ala tun ye kuma min fɔ a ka baarakɛla Musa ye, ko a bena jamana nin bɛɛ don aw bolo, ani k'a kɔnɔ mɔgɔw bɛɛ halaki, i ka baaradenw y'o mɛn, aw fana ye an jaa tigɛ ka siranya bila an na, o le y'a to an y'a kɛ ten.