Chutiang bawkin nangni nute u, in pasalte thu awih rawh u; chutichuan, an zîngah Pathian thu awih lo an awm pawhin, thu hrilh kher ngai lovin in chêt dân chuan a hneh mai ang,
thinlung aṭanga mize dik, rilru thuhnuairawlh leh nunnêm, inthuamna chhe thei lo chuan inchei zâwk rawh u, chu chu Pathian mit hmuhin a hlu êm êm a ni.
Nangni pate u, chutiang bawkin nupa in nihnaah in nupuite dimdawi rawh u, chak lo zâwk an nih avâng leh Pathian khawngaihna thilpêk, nunna chu, chanpuitu che u an nih hriain zah thiam rawh u. Tichuan, in ṭawngṭaina dâltu eng mah a awm dâwn lo nia.
Nimahsela, thuhnuairawlh leh hawihhâwm takin, chhia leh ṭha hriatna thiang tak neiin ti ang che u; tichuan, Kristaa in awm dân ṭha sawi hnâwmtute chu tihzahin an awm dâwn nia.
Krista pawh kan sualte avângin vawi khat a thi a, Pathian hnêna hruai theihna tûr che uin, mi dik chu mi dik lote tân a thi a ni. Tisaah tihhlum a ni a, thlarauvah erawh chuan tihnunin a awm.
Chûngte chu Nova lawng tuk chhûnga Pathianin dawhthei taka a nghah laia, awih duh lote thlarau kha an ni. Lawngah chuan, mi tlêm tê, pariat lek, tuia chhandam an ni.
Chumi anpui baptisma hian, Isua Krista thawhlehna avângin tûnah a chhandam ta che u a ni; baptisma chu taksaa bawlhhlawh silfaina mai a ni lo, chhia leh ṭha hriatna thiang taka Pathian hnêna thu tiamna hi a ni zâwk.