U rikom c'ax ri Crist pa ri u cuerp, rumal ri' xukuje' ri ix chisuc'umaj iwib che u rikic ri c'ax. Ri jun c'ut ri curik c'ax pa ri u cuerp, u yo'm c'u can ri mac.
Chubana' c'u chiwe ri i chac pa tak ri k'ij ri xeboc'ow canok, aretak xiban ri jastak ri cäquirayij ri man e cojonelab taj. Xiban ronojel ri xiwaj, xiban ronojel ri itzel i rayibal, xixk'abaric, xiban nimalaj mac aretak ximulij iwib che nimak tak wa'im, ximulij iwib che u tijic tzam, xebik'ijilaj tak diosib ri e tz'il.
E are ri man e cojonelab taj caquimayo, rumal rech chi man quebiwachilaj ta chic che u banic q'ui jastak xak jas ri cäcaj, jas ri xiban nabe. Quixquiyok' c'ut.
Rumal ri' ri tzij rech colobal ib kas xk'alajisax chque ri e cäminak chic, rech ri tzij rech colobal ib cäcuinic cuk'attzij paquiwi' jas kas ri u cholajil ri c'aslemal ri xcuc'aj we winak ri' pa ri ti'jol. Xukuje' xtzijox ri tzij rech caya' k'ijol chi cac'oji' qui c'aslemal pa ri uxlabal jas kas ri u rayibal ri Dios.
We c'o jun cätzijonic, je chtzijonok jas ri e u tzij ri Dios. We c'o jun cäpataninic, chpataninok je jas ruc' ri cuinem ri cuya' ri Dios. Jeri' pa ronojel cänimarisax u k'ij ri Dios rumal ri Jesucrist, ri nim u k'ij xukuje' ri c'o u cuinem amak'el chbe k'ij sak. Je chbanok.
Lok'alaj tak wachalal, mixmayin che ri c'ax ri quiriko, je ta ne jun k'ak' ri cänicow chixo'l. Are cäpe piwi' che u k'alajisaxic we utz quibano o man utz taj. Miwilo je ta ne ri quic'ulmaj jun jasach ri man iweta'm taj.
Xane' chixquicotok, rumal rech chi quic'am iwe ri u c'axc'olil ri Crist. Jeri' xukuje' aretak quiwil na chi cäpe ri Crist, nim u k'ij cäpetic, quixquicot na ruc' nimalaj quicotemal.
We c'o jun chiwe curik c'ax, ma ta u mac rech chi cämisanel, eläk'om, o banal apachique etzelal, mawi rumal u nimic rib chquipam jastak ri e quech niq'uiaj winak chic.
Xurik ri k'ij aretak cächaplex ri k'atoj tzij paquiwi' ri e aj uwo rachoch ri Dios. We c'u nabe cächaplex kuc' uj, ¿jas c'u lo ri qui q'uistajic ri winak ri man queniman ta che ri u tzij ri Dios?