×

పవిత్తర్ బైబిల్ 2025

1 పేతురు 4

1
క్రీస్తూ జీవ్దామా భావేటి పాయొ జేతీ తమ్ సదా అస్ దల్లేన హత్యారేర్ నైఁ ప్యార్లో.
2
కసేనకతో జీవ్డామా భావేటి పాయోవాళో, జీవ్డార్ వడీ జీవ జకో బడన్ ఛజకో డాడ్, అబ్బేతి మన్క్యార్ కూంతేన ప క్డన్ న చాలజూఁ, దేవేర్ ఖాతరేర్-నైఁజ్ చాలజూఁ, పాపేర్ వాటేమా న చాలజూఁ రచ.
3
అపణ్ మస్కరి కరేరో, ఖరాప్ ఆశాయే, నిసార చీజే, ఆటేతీ భరీజకో రమ్తీ, పియ్యాఖోరేఁవూఁర్ దావతే, కరేజాయేని జకో మూరతేఁవూర్ పూజా, అన్య జనూర్ ఖాతరేన పూరోకరేరో గోజకొ సమ్యాజ్ ధేర్ వేగో.
4
పవిత్తర్ ఛేనిజే ఓ ఖరాప్ కామేవూమా హాఁసో లేన ఉందూర్ సాత్ తమ్ ధాంసేకొని జేతీ ఓ అఫ్సోస్ వేన్ తమేన దూషణ్ కర్రేచ.
5
బంచ్రే జేనన్, మర్గేజేన, నేవ్ కరేన తయ్యార్ ఛజే దేవేన ఓ లేకో దేణో.
6
మర్గేజకో జీవ్డార్ వాతేర్ వడీ మన్క్యార్ తరీకాతీ నేవ్ పావజూఁన్, ఆత్మార్ వడీ దేవేర్ వడీతి బంచజూఁ ఉందూన సదా ఆచ్ ఖబర్ ప్రచార హుయీఁ.
7
జేతీ సొగ్ళీర్ అంత్ ఢైఁఆన్ ఛ. జేతీ తమ్ అక్కలే దార్ వేన్, అరజ్ కరేన జాగన్ రో.
8
ప్రేమ్ ఘణే పాపేవూఁన బూర్దచ, జేతీ సేతి జాదా ఏకేపర ఏక్ భర్పూర్ ప్రేమేతి రో.
9
ఠణకోనజూఁ ఏకేన ఏక్ ఖొరాకీ, పాణీర్వడీ దేక్భాల్ కరో.
10
దేవేర్ హర్యేక్ తరీకార్ కృపార్ వడీ ఘరేర్ ఆచ్చే కార్భారీర్నాఁయిఁ రేన్, ఎకేక్ కృపార్-వర్దాన్ పాయే జేన పక్డన్ ఏకేన-ఏక్ సేవా కరో.
11
ఏక్ బోధా కరతో దేవేర్ వాతేన బోధా కర్ణో, ఏక్ సేవా కరతో దేవ్ దినోజే సామర్థ్యతా పాన్ సేవా కర్ణో, ఏర్ కార్ణే దేవ్ సేమా యేసూక్రీస్తూర్ వడీ మహిమ పావచ, జగు జగు లగు మహిమాన్, జోర్, ఓనజ్ వేజాయ, ఆమేన్.
12
ప్రేమేర్ సాతీయో, తమేన పర్చేమా ఘాలేన అంగారేసరీక్ మోటే భావేటీర్ వడీ తమేన కాఁయిఁకో కళేనిజకో వేరోజూఁ అచామో ఖావో మత్.
13
క్రీస్తూర్ మహిమా బార పడజనా, తమేన ఘణో ఖుషీవజుఁ, క్రీస్తూర్ భావేటిమా తమ్ భాగ్ లేరేజకొ వేన్ ఖుషీతి రో.
14
తమ్ క్రీస్తూర్ నామేర్ వాస నిందా పావోతో మహిమార్ రూపేర్ ఆత్మా, కతో దేవేర్ ఆత్మా, తమార్-పర హుబోచ జేతీ తమ్ నసీబ్-దార్
15
తమార్మా కుణీతీ మన్క్యాన మార్నాకేవాళేర్ నైఁక, చోరేర్-నైఁక, ఖరాప్ వాటేమా చాలేవాళేర్-నైఁక, ఏకేర్ ఛేడ్ జాయెవాళేర్-నైఁ రేన్ వతోయి భావేటీ పడేర్ ఛాజేని.
16
పణ్ కుణీతీ క్రీస్తూవాళో వజేర్ కార్ణే భావేటీ పావతో ఊ లాజ్ నకరజూఁ, ఓ నామేర్ వడీజ్ దేవేన మహిమా కర్ణో.
17
నేవ్ దేవేర్ ఘరేర్ డైఁ సరూవేర్ సమ్యా ఆన్పడోచ; ఊ నేవ్ అపణ్ కనజ్ సరూవతో, దేవేర్ ఆచ్ ఖబర్ మానే కోని జేర్ హాల్ కాఁయిఁ వేణో?
18
ఉజ్జీ నియత్దారజ్ రక్షణ్ పాయెరో కఠిన్ వతో, భక్తి ఛేనిజకోన్, పాపీ కత్త హూబ్రచ?
19
జేతీ దేవేర్ ఖాతరేర్-నైఁ భావేటీ కరేవాళ్ ఆచ్చో చాల్ చాలేవాళ్ వేన్, భారోసేదార్ ఛజకో సృష్టీర్ కర్తాన ఉందూర్ ఆత్మావూన హవాలే కార్దేణో.
Lambadi Bible 2025
2025, The Bible Society of India
:
Save Notes