Mi Saymɔn Pita, we de wok fɔ Jizɔs Krays ɛn we na wan pan in apɔsul dɛn, de rayt to una we biliv pan am lɛkɛ aw wisɛf biliv pan am, bikɔs wi Papa Gɔd ɛn Jizɔs Krays we sev wi de du wetin rayt ɔltɛm. Di biliv we wi biliv pan am ɛn di biliv we una biliv pan am nɔto tin we mɔni kin bay.
We wi no am, i dɔn gi wi ɔltin we wi fɔ gɛt fɔ mek wi ebul liv lɛkɛ aw i want mek wi liv bay in pawa. Gɔd kɔl wi fɔ mek wi gɛt pan di wɔndaful ɔna ɛn pawa we i gɛt ɛn mek wisɛf gud lɛkɛ aw i gud.
Na dat mek Gɔd dɔn gi wi dɛn wɔndaful blɛsin we mɔni nɔ kin bay, we i bin dɔn prɔmis, so dat we una gɛt dɛn tin ya, una nɔ go de fala una at fɔ du dɛn bad tin we dɔn pwɛl di wɔl, bɔt una go du dɛn tin we Gɔd insɛf kin du.
Na dat mek, fɔ jɛs biliv pan Gɔd nɔmɔ nɔ du, pantap dat, una fɔ du ɔl wetin una ebul so dat una go gud, ɛn pantap dat igen, una fɔ sabi Krays mɔ ɛn mɔ.
Pantap dat, una fɔ de ɛp una kɔmpin Kristiɛn dɛn, ɛn una nɔ fɔ jɛs de ɛp dɛn nɔmɔ, una fɔ lɛk dɛn; na ɔl dɛn tin ya una fɔ de du pantap di biliv we una biliv pan Krays.
Bɔt if ɛnibɔdi de we nɔ de du dɛn tin ya, da pɔsin de tan lɛkɛ blɛnyay man ɛn i dɔn fɔgɛt se Krays bin dɔn pul sin kɔmɔt nain layf fɔ mek in layf klin.
Mi Kristiɛn brɔda dɛn, na dat mek una fɔ tray fɔ du di wok we sho se Gɔd kɔl una ɛn pik una fɔ tru; if una du ɔl dɛn tin ya, una nɔ go lɛf fɔ biliv pan Gɔd ɛn tap fɔ waka wit Gɔd.
Wɛn wi tɛl una se wi Masta Jizɔs Krays go kam bak na dis wɔl wit pawa, nɔto kɔni sɛns wi tek pul stori we nɔto tru, bɔt wisɛf si am wɛn i bin de sho in pawa.
Wi bin de wɛn Gɔd we na wi Papa gi wi Masta Jizɔs Krays big ɔna ɛn pawa, ɛn wi yɛri big ɛn wɔndaful vɔys, we kɔmɔt ɔp to Gɔd na ɛvin de tɔk se, “Dis na mi Pikin we a lɛk bad. A satisfay wit am.”
Dat mek wi biliv mɔ ɛn mɔ ɔl wetin dɛn prɔfɛt bin dɔn tɔk. I go gud if una tek dɛn wɔd ya lɛkɛ se dɛn na layt we de shayn na dak ples, ɛn mek da layt de shayn insay una at we bin dak, sote di big de kam, ɛn sote di mɔnin sta kam shayn insay una at.