जिंआं बड़ी पैहल्ले इस्राएली लोकां च झूठे भविष्यवक्ता थे, तिंआं ई तुहां च भी झूठी सिक्षा दैणे आल़े हुंगे, सैह़ ऐदिआं झूठियां सिक्षां च फंसी जांगे, जिसदिया बज़ाह ते सैह़ यीशु मसीह पर बसुआस करणा छड्डी दिंगे। ऐत्थु तिकर कि एह़ झूठे सिक्षक यीशु मसीह जो अपणा मालक मन्नणे ते इन्कार करगे, जिन्हीं तिन्हां जो अपनाया कने पापे दिया ताकता दे अजाद कित्ता, इस तरीके नैं सैह़ तिन्हां जो चाणचक नास करी दिंगे।
क्जोकि जाह़लू परमात्मैं तिन्हां सुअर्गदूतां जो भी माफ नीं कित्ता, जिन्हां पाप कित्या था, अपर तिन्हां जो न्याय दे दिने दा इन्तजार करणे कने सज़ा पाणे तांई नरके च घल्ली दित्ता।
कने तुहां एह़ भी जाणदे हन, कि जाह़लू पराणे जमाने दे लोकां परमात्मे दा डर नीं मन्नेया, तां परमात्मे तिन्हां लोकां दे बुरे कम्मां जो नजर अंदाज नीं कित्ता, कने पूरे संसारे पर जल प्रलयै घल्ली नैं तिन्हां दा नास कित्ता, अपर तिन्हीं नूहे समेत अठां माणुआं जो बचाई लेआ, जेह्ड़े तिसदिया नजरा च धर्मी थे।
कने तुहां एह़ भी जाणदे हन, कि बड़ी पैहल्ले परमात्मे सदोम कने अमोरा दे लोकां दी भी तिन्हां दे बुरे कम्मां दिया बज़ाह ते निंदा कित्ती, इसतांई तिन्हीं तिन्हां जो फुकी करी नास करी दित्ता, इआं करी नैं तिन्हीं एह़ दस्सेया कि जेह्ड़े लोक तिसदा डर नीं मनदे, तिन्हां नैं इआं ई हुंगा,
अपर सदोमे जो नास करणे ते पैहल्लैं परमात्मे लूते जो जेह्ड़ा इक्क धर्मी माणु था, तिसियो तिस सैहरे जो छड्डणे दा मौका दित्ता, तांजे तिसियो बचाई लैं, कने लूत सदोम सैहरे दे लोकां ते बड़ा भरी दुखी था। क्जोकि तिन्हां कुसी भी व्यबस्था जो नीं मन्नेया, अपर सिर्फ बुरे कम्म ई कित्ते।
परमात्मे एह़ सारे कम्म कित्ते, जेह्ड़े एह़ दस्सदे हन कि सैह़ अपणे लोकां जो तिन्हां दियां मुसीबतां ते बचाणा जाणदा ऐ, कने बुरे लोकां जो न्याय दे दिने तिकर लगातार सज़ा दैणा भी जाणदा ऐ,
सैह़ हर जणासा नैं जिसा जो दिक्खदे हन ब्यभिचार करणा चांह़दे हन, कने सैह़ पाप करणे तांई मौका तोपदे रैंह्दे हन। सैह़ तिन्हां लोकां जो धोखा दिंदे हन, जेह्ड़े बसुआसे च कमजोर हन कने सैह़ तिन्हां दी पाप करणे च अगुआई करदे हन। क्जोकि तिन्हां दियां बुरिआं इच्छां कने लालच जेह्ड़े लगातार बधदे जा दे हन, तिन्हां दिया बज़ाह ते ई परमात्मा तिन्हां जो सज़ा दिंगा।
जाह़लू लोक प्रभु यीशु मसीह जो अपणा प्रभु कने उद्धारकर्ता मन्नेया था, ताह़लू तिन्हीं तिन्हां जो इस संसारे दिया बुराईया ते बचाई लेआ था। अपर हुण भिरी दुवारी सैह़ तिन्हां बुरे कम्मां च फंसी गियो हन, जेह्ड़े तिन्हां जो अपणे बसे च रखदे हन, इसतांई हुण तिन्हां दी हालत पैहल्ले ते भी बड़ी बुरी होई गियो ऐ।
मेरे ग्लाणे दा मतलब एह़ ऐ कि परमात्मा तिन्हां लोकां जो जिन्हां यीशु मसीह जो कदी अपनाया नीं, तिन्हां जो तां सज़ा दिंगा ई अपर तिन्हां जो तां होर भी कड़ी सज़ा दिंगा जिन्हां यीशु मसीह जो अपनाई करी छड्डी दित्या ऐ। एह़ खरा हुंदा कि तिन्हां धार्मिकता दी ज़िन्दगिया दे बारे च नीं जाणेया हुंदा। हुण सैह़ जाणदे हन कि खरा क्या ऐ, अपर हुण तिन्हां परमात्मे दे हुक्मां जो मन्नणा छड्डी दित्या ऐ, जेह्ड़े अहां तिन्हां जो दित्यो थे।