तिनीहरू जानी-जानीकन पनि सृष्टिका कुरा नजानेझैँ गर्छन्। परमेश्वरले आफ्नो वचनले नै स्वर्ग र पृथ्वी सृष्टि गर्नुभयो। पृथ्वी पानीबाट र पानीद्वारै बनियो।
तर अहिले भएको आकाश र पृथ्वी पनि आगोमा भस्म पारिन परमेश्वरको त्यही वचनले नै जोगाइराखिएको छ। परमेश्वर नमान्ने मानिसलाई दोषी ठहराएर नाश नगरेसम्म आकाश र पृथ्वी रहिरहनेछन्।
कसै-कसैले विचारेजस्तो परमप्रभु परमेश्वर आफ्नो प्रतिज्ञा पूरा गर्न ढिलाउनुहुनेछैन। तर उहाँले तिमीहरूलाई पर्खिरहनुभएको छ। तिमीहरू कोही पनि नाश नभएको उहाँ चाहनुहुन्छ अनि सबैले आफ्ना पाप त्यागून् भन्ने उहाँको इच्छा छ।
तर प्रभुले न्याय गर्नुहुने दिन चोरझैँ अचानक आउनेछ। त्यस दिन आकाश-मण्डल ठूलो आवाज गरेर हराउनेछ आकाशका तारा, ग्रह-नक्षत्रहरू जलेर भस्म हुनेछन्। पृथ्वी र पृथ्वीमा भएका सबै कुरा नाश हुनेछन्।
तिमीहरूले परमेश्वरको न्याय गर्ने दिनको बाटो हेर्दा यो चाँडै होस् भनेर गर्नुपर्ने काम गर। त्यसै बेला आकाश-मण्डल डढेर भस्म हुनेछ अनि ग्रह-नक्षत्र तातोले पग्लेर जानेछन्।
प्रभुले तिमीलाई पापबाट बाँच्ने मौका दिनुहुँदा उहाँ कति धीरजी हुनुहुन्छ, सो ध्यान देओ। हाम्रा प्रिय भाइ पावलले पनि परमेश्वरद्वारा पाएको ज्ञानबाट यी नै कुरा तिमीहरूलाई लेखेका थिए।
यस बारेमा तिनले त्यस्तै कुरा आफ्ना पत्रहरूमा लेखेका थिए। उनले लेखेका कति कुराहरू केही अप्ठ्यारा छन्। नजान्ने र बेटुङ्गे मानिसहरूले त्यसको उल्टा-पाल्टा अर्थ पनि लाउँछन्। उनीहरूले धर्मशास्त्रको पनि त्यसरी नै अर्थ लगाउँछन्। यसरी उनीहरूले आफैंलाई नाशमा पुर्याउँछन्।
तर प्रियहरू, तिमीहरूलाई यी सबै कुरा थाहा भइसकेका छन्। यसकारण होशियार गर। त्यसो हुँदा दुष्टहरूले अलमल्याउन पाउनेछैन अनि आफूले दह्रो गरी टेकेका ठाउँबाट लड्नेछैनौ।