Ne deenw, ne be sɛbɛ nin cira aw ma, waasa aw kana hakɛ kɛ. Nga ni min nan'a kɛ, soronanikɛla b'an fɛ Faa Ala kɔrɔ n'o ye Yezu Krista ye, mɔgɔtilennin lo.
Ne be nin sɛbɛn k'a ci aw denfaw ma, ko mɔgɔ min be yen kabini fɛɛn si ma dan fɔlɔ, aw b'o lɔn. Ne be nin sɛbɛn k'a ci aw kanbelenw ma ko aw ye see sɔrɔ Fɛnjugu kan.
Ne deenw, ne y'a sɛbɛn k'a ci aw ma ko aw be Faa Ala lɔn. Ne y'a sɛbɛn k'a ci aw denfaw ma ko mɔgɔ min be yen kabini fɛɛn si ma dan fɔlɔ, aw b'o lɔn. Ne y'a sɛbɛn k'a ci aw kanbelenw ma, ko fanga b'aw la, Ala ka kuma jiidinin be aw dusu la. Ani ko aw sera Fɛnjugu kɔrɔ.
Ne deenw, diɲɛ labantuma surunyana. Aw y'a mɛn ko Krista jugu ka kan ka na. K'a sɔrɔ a juguw yɛrɛ ka ca bii nin na. An b'a lɔn o le fɛ ko diɲɛ labantuma surunyana.
Aw kɔni, min fɔra fɔlɔ la n'aw y'a mɛn, aw k'o mara ka ɲa aw dusu la. Aw ye min mɛn kabini fɔlɔ la, n'o tora aw dusu la, Faa Ala n'a Dencɛ bena to n'aw ye.
N'o tɛ aw kɔni, aw ye Krista ka Nii Senuman min sɔrɔ, o b'aw fɛ. Aw be koo lɔn, kalankun t'aw la. Nii Senuman b'aw kalan koo bɛɛ la. A b'aw kalan ni min ye, galon si t'o la. Aw ye l'a la ɲanaman ka nɔrɔ Krista la.