Mi padi dɛn we a lɛk, di lɔ we a de rayt tɛl una fɔ kip, nɔto nyu lɔ, na di sem ol lɔ we una bin dɔn gɛt frɔm tɛm. Una bin dɔn yɛri bɔt dis ol Ju lɔ ya.
Ɛniwe, dis sem lɔ ya nyu bikɔs di daknɛs dɔn go wansay ɛn di tru layt dɔn bigin shayn, una go si se dis nyu lɔ ya na tru we una luk Krays in layf ɛn una sɛf yon.
Mi pikin dɛn, a de rayt una bikɔs una no di Papa. Mi papa dɛn, a de rayt una bikɔs una no di wan we bin dɔn de frɔm we di wɔl bigin. Yɔŋ man dɛn, a de rayt una bikɔs natin nɔ ebul una. Gɔd in wɔd de insay una at ɛn una dɔn win Setan.
Ɔltin we de na di wɔl di bad we de na pɔsin in at we de mek i put at pan sɔm tin dɛn, dɛn tin we pɔsin kin want bad bad wɛn i si dɛn, ɛn ɔl dɛn tin na di wɔl we de mek pɔsin prawd dɛn nɔn nɔ kɔmɔt to di Papa, na di wɔl dɛn kɔmɔt.
Mi pikin dɛn, di tɛm we di wɔl go dɔn, dɔn kam klos. Dɛn bin dɔn tɛl una se di wan we nɔ lɛk Krays atɔl gɛt fɔ kam, ɛn plɛnti pipul we nɔ lɛk Krays dɔn kam naw; na dat mek wi no se di tɛm we di wɔl go dɔn, dɔn kam klos.
Dɛn pipul de nɔto bin wi yon pipul dɛn, na dat mek dɛn lɛf wi go; bikɔs if dɛn na bin wi yon pipul, dɛn bin fɔ de wit wi. Bɔt dɛn lɛf wi so dat ɔlman go no se dɛn nɔn nɔto bin wi yon pipul.
So, nɔto bikɔs una nɔ no wetin tru mek a de rayt to una bɔt Krays, a de rayt bikɔs una no wetin tru bɔt Krays. Una no se lay nɔ gɛt ɛnitin fɔ du wit wetin tru.
So udat de lay? Na di wan we se Jizɔs nɔto di Mɛsaya, nain na di wan we nɔ lɛk Krays. I nɔ want fɔ gɛt ɛnitin fɔ du wit Gɔd we na di Papa ɛn i nɔ want fɔ gɛt ɛnitin fɔ du wit Gɔd in Pikin.
Ɛni bɔdi we nɔ want fɔ gɛt ɛnitin fɔ du wit Gɔd in Pikin, nɔ want fɔ gɛt ɛnitin fɔ du wit Gɔd we na di Papa; bɔt ɛni bɔdi we gri fɔ waka wit Gɔd in Pikin, dɔn gri fɔ waka wit Gɔd we na di Papa.
Di tɛm we una bin jɛs bi Kristiɛn a bin tɛl una sɔntin. Una fɔ kip am na una at. If di tin we una bin dɔn yɛri fɔs tɛm de na una at, dat go mek una gɛt wanwɔd wit Gɔd we na di Papa, ɛn in Pikin.
Krays dɔn gi unain Spirit, ɛn wans i de insay una, una nɔ nid fɔ gɛt ɛni bɔdi fɔ lan una ɛnitin bɔt Gɔd, bikɔs Krays in Spirit de lan una ɔltin ɛn ɔl wetin i de lan una na tru, nɔto lay. So una fɔ de wit Krays ɔltɛm lɛkɛ aw in Spirit dɔn lan una fɔ du.