म्यारा प्यारा नन्तिनो, मैं इन बातुन तुमून येक कारण लिखछूँ, कि तुम पाप जन करा, और अगर कोई पाप करो त पिता परमेश्वरा का पास हमोरो एक मद्दगार छै, उ यीशु मसीह छै जो हमार पापून की माफी खिन प्रार्थना करछो, उ धर्मी छै।
हे म्यारा प्रिय दगड़ियो, मैं तुमून कोई नय्या हुकुम नै लिखनू, लेकिन उई पुरानो हुकुम जो शुरू भटे तुमून मिलीना को छै; यो पुरानो हुकुम उई वचन छै, जैस तुमले सुणि रैछ, जब तुमूनले प्रभु यीशु मसीह में विश्वास करछ्य।
फिरले जो हुकुम मैं तुमून लिखछूँ उ नय्या हुकुम छै; किलैकी येकी सच्चाई मसीह में और तुमून में दिखाई दीछी। क्याखिनकि अन्यारो खतम हुनै जानर्योछ और सच्चाई को उज्यालो ऐल चमकून लाग ग्योछ।
लेकिन जो कोई अपून भाई थैं बैर राँखछो, उ अन्यारा में जीनमर्योछ और हिटून मर्योछ, और यो नै जाणनो कि काँ जानमर्योछ, क्याखिनकि अन्यारा ले उक आँखान अन्धा कर दीयान।
हे म्यारा बुजुर्गो, मैं तुमून येक कारण लिखछूँ, किलैकी तुम मसीह स जाणछा जो पैलि भटे छै। हे जवान नान्तिनो, मैं तुमून येक कारण लिखछूँ, कि तुमले उ शैतान में जीत पाछ, हे नान्तिनो, मैंले तुमून येक कारण लिखछ्य, कि तुम पिता परमेश्वर स जाण गैछा।
हे म्यारा बुजुर्गो, मैं तुमून येक कारण लिखछूँ, किलैकी तुम मसीह जाणछा जो पैलि भटे छै। हे जवान नान्तिनो, मैंले तुमून येक कारण लिखछ्य, कि तुम बलवंत हो और परमेश्वरको बचन तुमून में बनिना को रौ, और तुमूले उ शैतान में जीत पाछ।
क्याखिनकि जो कुछ संसार में छै, मतलब शरीर की पापी इच्छान पुर करून और चीजून देखून और ऊस पान की इच्छा राखून और जो उक पास छै उमें घमंड करून, पिता परमेश्वरा का तरफ भटे नै, लेकिन संसारा का तरफ भटे छै।
हे नान्तिनो, यो आखिरी बखत छै; जब मसीह फिर है वापिस आलो और जसो तुमूले सुणिना को छै, कि मसीह विरोधी उनवालो छै, उक अनुसार अब ले भौत मसीहा का विरोधी आ ग्यान; येले हम जाणनू कि यो मसीह वापस उना बखत छै।
उन मसीह विरोधी दल में भटे निकल भेरन आईना का छन, लेकिन उन हमार अपून नी छ्या सच्ची में हमून में भटे नी छ्या, क्याखिनकि उन अपून हुना, त हमार दगाड़ रूना; लेकिन उनूनले हमून येक कारण छोड़ दीछ किलैकी उन हमार दगड़िया नी छ्या।
उ संदेश जो तुमूले सुणछ्य जब तुमून ले यीशु मसीह में विश्वास करछ्य, अगर उ तुमून में बनिना को रौलो, त तुम ले च्याला में और पिता परमेश्वर में बनिना का रौला।
लेकिन तुमून पवित्र आत्मा जो यीशु मसीहक द्वारा मिलीना को छै; जो तुमारा भितर रूछो; येक कारण कैसे ले तुमून सच्चाई का बारिमें सिखून की जरूरत नाहातिन। हालांकि जसीकैं तुमून यीशु मसीह का द्वारा मिलीना को छै उसीकैं तुमून सब बात सिखूछो, और पवित्र आत्मा सच्चो छै, और झूठ्ठो नाहाति; और जसो उले तुमून सिखाछ, उसीकैं तुम उमें बनिना का रौ।