Muře glati, me ramov tumenge kadala dieli, eta te na keren tume bezexa. Ai te si varekon ke kerdias bezex, amen si ame jekh advokato paša o Dad, o Jesus Kristo o vorta.
Muře kuč, nai jekh poronka nevi ke me ramov tumenge, numa jekh poronka purani kai si tume de anda o gor; kudia poronka purani, si e vorba kai tume ašundian.
Me ramosardem tumenge, muře glati, ke tume žianglian le Daden. Me ramosardem tumenge, dada, ke tume žianglian kudales kai si de anda o gor. Me ramosardem tumenge, ke tume san zurale, ai e vorba le Devleski bešel ande tumende, ai ke tume nirisardian le xitros.
Tsinoře glati, si o mai paluno časo, ai sar ke tume ašundian ke o dušmano le kristasko avel, si akana but dušmanuri Kristoske: kathar ame žianas ke si o mai paluno časo.
Von ankliste avri amendar, numa von nas anda amare; ke t'avelino anda amare, von sas te bešen amensa, numa kudia areslias eta te sikavel ke von nai anda amare.
Eta so tume ašundian de anda o gor te bešel ande tumende. Te si ke so tume ašundian de anda o gor beše ande tumende, tume bešen vi ande jekh than le šiavesa ai le Dadesa.
Tumenge, o svintsimos kai tume lian lestar bešel ande tumende, ai tumen či mai trubul te sikiaren tume; numa sar lesko svintsimos sikiarel tumen ande sa le dieli, ai ke kudo si o čačimos ai ke nai jekh xoxaimos. Bešen ande leste sar sas o sikiarimos kai sas tumenge dino.
Ai akana, tsinoře glati, bešen ande leste, eta ke, kana vo sikadiola, amen t'avel amen patiamos, ai kana vo avela te na avel amenge lažiav ai te garavas amen lestar.