Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasian’ tate hong kici a, hong kicih mah bang ihi takpi hi. Leitung mite in tuhun ciang dong Pasian thei lo uh ahih manin eite zong a hong thei lo uh ahi hi.
Ka lawm itte aw, eite’ pianzia ding taktak a telin hong kilat nai loh hangin tu-in Pasian’ tate ihi hi. Ahi zongin Khrih hong kilat ciangin ama pianzia ahi bang teekteekin mu ding ihih manin amah i bat nading thu teltakin i thei hi.
A kipat cil a kipanin Dawimangpa in mawhna bawl tawntung ahih manin mawhna a bawl mi khempeuhte zong Dawimangpa’ mi ahi hi. Hih Dawimangpa’ nasepna a beisak dingin Pasian’ Tapa a hong pai hi.
Itna i cih bangci theih ding ihi hiam cih leh: Khrih in eite a dingin a nuntakna hong pia hi. Ei zong i Khristian mipihte a dingin i nuntakna i piak ngam ding ahi hi.
Mi khat hau mahmah hen la, a Khristian mipih a cimawhte mu napi-in huhna bangmah pianuam hetkei leh, bang hangin amah in Pasian ka it hi, ci thei ding ahi hiam?
Pasian’ thupiakna a zui mi khempeuh, Pasian tawh om uh a, Pasian in zong amaute a ompih hi. Pasian in eite tungah a hong piak Kha Siangtho hangin Pasian in eite a hong ompihna thu i thei hi.