जरा सोचा, कि पिता परमेश्वर ले हमून कदुक प्रेम करछ्य, ताकि हम परमेश्वरा का सन्तान बना; और सच्ची में हम उक सन्तान छा ले। लेकिन यो संसारा लोग नै जाणना कि हम परमेश्वरा का सन्तान छा, क्याखिनकि उन पिता परमेश्वर नै जाणना।
हे प्रिय दगड़ियो, अब हम परमेश्वरकि सन्तान छा, और अब तक यो प्रगट नै भ्यो कि भविष्य में हम की बनला, बश हम इतुक जाणनू कि जब उ प्रगट होलो त हम ले उक समान हूँला, क्याखिनकि हम ऊस ऊसो देखला जसो उ छै।
जो कोई परमेश्वर की सन्तान छै, उ लगातार पाप नै करूनो; क्याखिनकि परमेश्वरो को स्भाव उमें छै और उ लगातार पाप नै कर सक्नो, क्याखिनकि उ परमेश्वर की सन्तान छै।
और आदमो को च्योलो कैना का नियाती जन बना, जैले शैतान की बातुन मानछ्य, और जैले अपून भाई हाबिल को खून करछय। और ऊस कि कारण ले मारछ्य? येक कारण कि उक काम बुरा छ्या, और उक भाई का काम धार्मिकता का छ्या।
हमून पत्तो छै, की हम मौते की शक्ति भटे आजाद हो ग्या और येल हमार पास परमेश्वरा का तरफ भटे अनन्त जीवन छै, किलैकी हम विश्वासी भाईन का दगाड़ प्रेम राखनू; और जो प्रेम नै राखनो उ मौत बश रूछो।
जब हम दुसरान का दगाड़ प्रेम करनू, त हम जाणला कि हम सच्चाई का छा। जब कभै ले हमोरो मन हमून दोषी ठैहरछो, तब हम अपून मनून में परमेश्वरा का सामुनि आराम पानू, क्याखिनकि परमेश्वर हमार मनून भटे ठूलो छै; और सब कुछ जाणछो।
और जो परमेश्वरो को हुकमून को पालन करछो, उ परमेश्वर में, और परमेश्वर उमें बनिना को रूछो; और येले उ पवित्र आत्मा जो उले हमून दी रैछ, हम जाणनू कि परमेश्वर हमून में बनिना को रूछो।