×

Marwari Bible

1 यूहन्‍ना 3

1
देखौ, पिता परमेसर नै म्हौरै ऊं कैड़ौ परैम कियो है की म्हौ उणरी औळाद कहीजौ, अर म्हौ हों भी। संसार म्हौ नै कोनीं जांणै, क्यूंकै संसार उणनै भी कोनीं जांण्यौ।
2
हे प्यारै भाइयो, अबै म्हौ परमेसर री औळाद हो, अर अजी तांई ओ परगट कोनीं होयौ, की म्हौ कांई कीं होवोला। इतौ जांणौ हो, की जद मसीह परगट होवैला तो म्हौ भी उणरै जैड़ा होवोला। क्यूंकै म्हौ उणनै वैड़ौ इज देखोला जैड़ौ वो है।
3
अर जिकौ कोई मसीह माथै आ आसा राखै है, वो अपणै आप नै वैड़ौ इज पवितर करै है जैड़ौ वो पवितर है।
4
जिकौ कोई पाप करै है, वो परमेसर रै कायदे नै तोड़े है क्यूंकै कायदे नै तोड़नो इज पाप है।
5
थै तो जांणौ ही हो की मसीह म्हौरै पापों नै दूर करनै रै लियै परगट होया अर ओ भी, की उणमे कोई पाप कोनीं है।
6
जिकौ कोई मसीह मे बण्यौ रैवै है, वो पाप कोनीं करता रैवै। जिकौ कोई पाप करता रैवै है, उणनै नीं तो उणरौ दरसण किया है अर नीं उणनै जांणै है।
7
हे प्यारै टाबरौ, किणी रै भटकाने मे नीं आवणौ। जिकौ धरम रा कांम करै है, वोहीज मसीह रै ज्यूं धरमी है।
8
जिकौ कोई पाप करतौ रैवै है वो सैतान री तरफ ऊं है, क्यूंकै सैतान सरूआत ऊं ही पाप करतौ आयौ है। परमेसर रौ बेटौ इण वास्तै परगट होयौ की सैतान रै कांमां नै नास करै।
9
जिकौ कोई परमेसर ऊं जनमियौ है वो पाप कोनीं करतौ रैवै, क्यूंकै परमेसर रौ जीवन उणमे बण्यौ रैवै है, अर वो पाप करतौ नीं रैह सकै क्यूंकै परमेसर ऊं जनमियौ है।
10
इण ऊं परमेसर री औळाद अर सैतान री औळाद जांण्या जावै है। जिकौ कोई धरम रा कांम कोनीं करै वो परमेसर ऊं कोनीं, अर वो भी कोनीं जिकौ आपरै भाई ऊं परैम कोनीं राखै।
11
जिकौ समाचार थै सरूआत ऊं सुण्यौ, वो ओ है की एक दूजै ऊं परैम राखौ।
12
कैन रै ज्यूं नीं बणौ, जिकौ उण सैतान ऊं हो, अर जिणै आपरै भाई नै घात कियो। अर उणनै कीण खातर घात कियो? इण खातर की उणरा कांम भूंडा हा, अर उणरै भाई रा कांम धरम रा हा।
13
हे विसवासी भाइयो, जे संसार थौरे ऊं बैर करै है तो अचूम्बो नीं करौ।
14
म्हौ जांणौ हो, की म्हौ मौत नै पार होयनै जीवन मे पूगा हो, क्यूंकै म्हौ विसवासी भाइयो ऊं परैम राखौ हो। जिकौ परैम कोनीं राखै, वो मौत री दसा मे रैवै है।
15
जिकौ कोई अपणै भाई ऊं बैर राखै है, वो हत्यारो है। अर थै जांणौ हो, की किणी हत्यारे में अनत जीवन कोनीं रैवै।
16
यीसु मसीह नै म्हौरै लियै आपरौ जीवन त्याग दियौ। इण ऊं म्हौ जांणौ हो की परैम कांई है। म्हौ नै भी अपणै भाइयो रै लियै अपणौ प्रांण दैणै रै लियै तैयार रैणौ चाहीजै।
17
बल्कि जिण किणी रै खनै संसार री जायदाद हो अर वो आपरै भाई नै कंगाल देखनै उण माथै तरस नीं खावै, तो उणमे परमेसर रौ परैम कीकर बण्यौ रै सकै है?
18
हे प्यारै टाबरौ, म्हौ वचन अर जीभ ऊं इज कोनीं, बल्कि कांम अर सचाई रै जरियै भी परैम करै।
19
इण ऊं म्हौ जांणौला की म्हौ सचाई रा हो। अर म्हौ नै परमेसर रै सांमै ऊभा रैणै री हीमत होवैला।
20
जे म्हौरौ मन म्हौ माथै दोस लगावै है तो, म्हौ जांणौ हो की परमेसर म्हौरै मन ऊं मोटो है, अर सगळौ कीं जांणै है।
21
हे प्यारै भाइयो, जे म्हौरौ मन म्हौ नै दोस नीं दे, तो म्हौ नै परमेसर रै सांमै तसली होवै है।
22
अर जिकौ कीं म्हौ मांगो हो, वो म्हौ नै उण ऊं मिळै है। क्यूंकै म्हौ उणरी आग्याओं नै मांनौ हो, अर जिकौ उणनै भावै है वोहीज करौ हो।
23
अर उणरी आग्या आ है की म्हौ उणरै बेटे यीसु मसीह रै सामरथी नाम माथै विसवास करै अर जैड़ी उणै म्हौ नै आग्या दी है उणरै अनुसार आपस मे परैम राखै।
24
अर जिकौ परमेसर री आग्याओं नै मांनै है, वो परमेसर मे, अर परमेसर उण मे बण्यौ रैवै है। अर इण ऊं, मतलब उण आतमा ऊं जिकौ परमेसर म्हौ नै दीनी है, म्हौ जांणौ हो की परमेसर म्हौरै में बण्यौ रैवै है।
Marwari Bible
NLCI CC BY-NC-ND 4.0
:
नोट सहेजें