Hinigugma ko nga Gayo, nagapangamuyo ako nga manginyara ka sa maayo nga kahimtangan kag sa maayo nga lawas, subong man nga nahibaluan ko nga yara sa maayo nga kahimtangan ang imo espiritu.
Nalipay gid ako sang pag-abot sang pila ka mga kautoran, kag nagsugid sila sa akon kon daw ano ang imo katutom sa kamatuoran, subong nga nagakabuhi ka sa gihapon suno sa kamatuoran.
Ginsugid nila diri sa iglesia ang nahanungod sang imo gugma. Kon sarang mahimo, buligi sila nga makapadayon sa ila pagpanglakaton sa pamaagi nga malipay ang Dios.
Gani kon mag-abot ako dira ibuyagyag ko ang iya tanan nga mga hinimuan: ang tama kalain nga mga butang nga iya ginapanghambal nahanungod sa amon, kag ang mga kabutigan nga iya ginapanugid. Pero indi lamang amo ina, kundi indi pa niya pagbatunon ang mga kautoran kon magkadto sila dira, kag ginapunggan pa gani niya ang mga luyag magbaton sang mga kautoran, kag ginatinguhaan niya nga tabugon sila sa iglesia!
Hinigugma ko nga Gayo, indi pag-iluga ang malain, kundi iluga ang maayo. Ang bisan sin-o nga nagahimo sing maayo iya sang Dios, kag ang bisan sin-o nga nagahimo sing malain wala makakita sa Dios.
Ang tagsatagsa nagasugid nga si Demetrio maayo nga tawo, kag ang kamatuoran mismo nagapamatuod sini. Kami man makapanaksi nahanungod sa iya kag nakahibalo kamo nga ang amon ginahambal matuod.
Ang paghidait manginyara sa imo. Ang tanan mo nga mga abyan nagapadala sang ila mga pag-abiabi sa imo. Abiabiha sing tag-isaisa ang tanan naton nga mga abyan.