मैं यहूदा जेह्ड़ा यीशु मसीह दा दास कने याकूबे दा लोक्का भाऊ ऐ, मैं एह़ चिठ्ठी तिन्हां लोकां दे नांऐ पर लिखा दा ऐ, जेह्ड़े परमात्मे दे जरिये तिस च बसुआस करणे तांई सद्देयो हन। अहां दा पिता परमात्मा तुहां नैं प्यार करदा ऐ कने यीशु मसीह दे जरिये तुहां जो बचांदा ऐ।
हे मेरे प्यारे साथी बसुआसियो, हलांकि मैं परमात्मे दे उद्धारे दे बारे च बड़ी मेहनत करी नैं तुहां जो लिखा दा था, जिस च अहां सारे साझी हन, मैं तुहां जो एह़ लिखणे तांई मजबूर होएया, कि तुहां जो सच्चाईया दी लड़ाई लड़णे तांई हौंसला देई सकैं। परमात्मैं अपणे लोकां जो एह़ सच्चाई इक्क ई बरी देई दित्तियो, जेह्ड़ी कदी नीं बदलदी।
मैं तिज्जो एह़ लिखा दा ऐ कि कुच्छ झूठे सिक्षक अहां सौगी मिल्ली गियो हन, जिन्हां दे बारे च परमात्मे बड़ी पैहल्ले ते ई पवित्रशास्त्रे च ग्लाई दित्या था, कि सैह़ तिन्हां जो सज़ा दिंगा। तिन्हां परमात्मे दे प्यारे दे सुसमाचारे जो कने अनुग्रह जो बगाड़ी करी नाजायज रिस्तेयां दे कम्मां च बदली दित्या ऐ। सैह़ यीशु मसीह दा भी इन्कार करदे हन, जेह्ड़ा अहां दा इक्को ई मालक कने प्रभु ऐ।
हलांकि तुहां जो पैहल्ले ते ई पता ऐ, अपर फिरी भी मैं तुहां जो याद करवाणा चांह़दा ऐ कि प्रभुयैं इस्राएली लोकां जो मिस्र देसे दिया गुलामिया ते छड्डाया था। अपर बादे च जिन्हां तिस पर बसुआस नीं कित्ता, तिन्हां दा तिन्हीं नास करी दित्ता।
तुहां जो तिन्हां सुअर्गदूतां दे बारे च भी सोचणा चाइदा, जेह्ड़े अपणिया पदविया ते खुस नीं थे, जेह्ड़ी परमात्मे तिन्हां जो दित्तियो थी, अपर तिसदे बजाये तिन्हां अपणिया पदविया जो छड्डी दित्ता, परमात्मे तिन्हां सुअर्गदूतां जो न्याय दे ओणे आल़े दिने तिकर संगल़ां नैं बन्नी करी नेहरे च रखेया ऐ।
तिंआं ई सदोम कने अमोरा कने तिन्हां दे अक्खे-बक्खे दे सैहरां जो याद करा, जित्थु दे लोक पापी कने ब्यभिचारी बणी गियो थे, सैह़ अपणियां लाड़ियां जो छड्डी करी दूईआं जणासां पचांह़ चली पैयो थे, इसतांई परमात्मैं तिन्हां जो अग्गी नैं नास करी दित्ता। एह़ जेह्ड़ा तिन्हां सौगी होएया सैह़ तिन्हां झूठे सिक्षकां तांई चतौणी बणी गेई, कि सैह़ भी सदा दी अग्गी दे जरिये नास कित्ते जांगे।
इन्हां उदारणा जो जाणने दे बावजूद भी झूठे सिक्षक एह़ दावा करदे हन, कि परमात्मैं तिन्हां जो सुपणे च एह़ दस्सेया कि सैह़ पाप करी नैं अपणे सरीरां जो भरष्ठ करदे हन, कने प्रभु दे अधिकारां जो नीं मनदे हन, कने सुअर्गदूतां दी निंदा करदे हन।
कने हनोके भी, जेह्ड़ा आदमे दी सतमी पीढ़िया ते था, जाह़लू तिन्हीं इन्हां लोकां दे बारे च एह़ भविष्यवाणी करी नैं ग्लाया, कि “दिक्खा, प्रभु जरूर अपणे मते सारे पवित्र दूतां दिया इक्क बड्डी भीड़ा सौगी ओआ दा ऐ।
अपर हे मेरे प्यारे साथी बसुआसियो, तुहां लगातार इक्की दूये दी मदत करदे, कने हौंसला दिंदे रेह्आ, कि तुहां पवित्र आत्मा च प्रार्थना कने बसुआस करदे हन। जेह्ड़ी तुहां जो सच्चाईया दा रस्ता दस्सदी ऐ,
कने कुच्छ होर लोकां जो जिन्हां दे बारे च तुहां जो लगदा कि नरके दिया अग्गी च जा दे हन, जेह्ड़ी कदी नीं बुझदी, तिन्हां जो तौल़ी बाहर खींजी करी बचाई लेआ, कने दूयेयां पर भी दया करा। तुहां जो चाइदा कि सैदेय पापां दे बची करी रेह्आ, ऐत्थु तिकर कि तिन्हां कपड़ेयां ते भी जिन्हां पर बुरेयां कम्मां दे दाग हन।
सिर्फ सैई इक्क परमात्मा ऐ, जिन्हीं अहां जो प्रभु यीशु मसीह दे जरिये बचाया। अहां दे प्रभु यीशु मसीह दे जरिये लोक परमात्मे जो आदर दैन, कने तिसदी स्तुति करन। सैह़ इसा गल्ला जो भी समझन, कि सुरू ते ई परमात्मे अल्ल सामर्थ कने अधिकार था, कने ऐ, कने हमेसा रैंह्गा। आमीन।