×

گیله ماز

یوحنائه مکاشفه 10

1
ایما بَدییَم ایتا دیگه رَسدار فِرِشتِه آسِمانِ جی جیر هَنِه. اون فِرِشته ایتا اَبرِ دِلهِ دَپیته با و ایتا رَنگین کمان اونه سَرِ وَر و اونه قیافه آفتابِ مِثان با و اونه لِنگ سِتونهای تَشِ مِثان با.
2
و ایتا کوچِ طومارِ واز هَکُردهِ، خودشه دَسِ دِلِه داشتِه. اون فِرِشته خودشه راسِ لنگِ دریایِ دِلِه و خودشه چَپِ لنگِ خشکی یه سَر بَنَه.
3
و ایتا گَتِه دادِ هَمرَه شیرِ مِثان نَعرِه بَکِشیِیَه، و همونجور که نَعرِه کَشَنه با، اون هفتا رادی صدا در‌ بومَه و گَب بَزَن.
4
وختی که اون هفتا راَد گَب بزن، خَسَّم بَنوِیسِم؛ ولی ایتا صِدا آسِمانِ جی بِشنَوِسَّم که باَگوته: «اونچه که اون هفتا راَد باگُوتَن رِه، مُهر و موم هَکُن و نَنویس.»
5
ایما اون فِرشتِه که بدیِه بام دریا و خشکی یه سَر ایسَبا، خودشه راسِ دَسِ آسِمانِ سمت بُلَند هَکُردِه
6
و اونه که تا اَبد و تا اَبد زِندِه هیسه، و آسِمان و هر اونچه که اونه دِلِه دَرِه و زمین و هر اونچه که اونه دِلهِ دَرِه و دریا و هر اونچه که اونه دِلِه دَرِه رِه خلق هَکُردِه، قَسَم بُخاردِه که: «دِ بیشتر اَز این دیر نَبونه.
7
بلکه اون روزانِ دِلِه که هَفتِمین فِرِشته خودشه شیپورِ صدا رِه دَر بیارِه، خُدایِ راز کامِلاً انجام بونه، همونجور که خودشه پاکاران، یعنی پیغمبرِانِ وَسین اعلام هَکُردِه.»
8
ایما اون صدا که آسِمانِ جی بِشنَوِسّه بام، یِدَفِه دیگه می هَمرَه گَب بَزَه و باَگوته: «بوشو و اون واز هَبا طومارِ که اون فرشتِه یه دَسِ دِلهِ که دَریا و خُشکی یه سَر ایساَ رِه، هَگیر.»
9
پَس مَن اون فرشته یه سَمت بَشَم و اونه باگوتَم که اون کوچِ طومارِ مَرِه هَدِه. فِرِشتِه مَرِه باَگوته: «اینه هَگیر و بُخار! تی دِلهِ رِه زَرخ کانه، وَلی تی دَهَنهِ دِلهِ عسلِ مِثان شیرِن بونه.»
10
مَن اون کوچِ طومارِ فرشته یه دَّسِ جی بِیتَم و بُخاردَم. می دَهَنهِ دِلهِ عسلِ مِثان شیرِن با، ولی هَمین که بُخاردَم می شِکَم زَرخ هَبا.
11
مَرِه باگُوته: «تو بایِسّی یِدَفِه دیگه خیلی قومان و خیلی مِلّتا و خیلی زبونا و خیلی پادِشاهانِ خَبَری نَبوَّت هَکُنی.»
Mazanderani GMB Bible 2024
@2024 Korpu Company
:
Save Notes