Di saha ka bɛ daa zaŋ bimbuɣisirigu din ŋmani jaaŋgbee ti ma ka yɛli ma: “Yiɣisima m-buɣisi Naawuni jɛmbu duu mini di bimbini, ka kali bɛn jɛmdi Naawuni di ni,
Bɛ mali yiko din ni tooi chɛ ka saa ku mi bɛ daanabitali yɛtɔɣa tɔɣisibu maa saha, ka mali yiko din ni tooi chɛ ka koma lɛbigi ʒim, ka ni tooi chɛ ka alɔbo balibu kam lu dunia ni kaman bɛ suhu ni yu shɛm.
Ka bɛn yi dɔɣim kam zaa ni mini zuliya balibu kam ni ni niriba balibu kam ni ni tinzun yɛligu kam nim’ ni na ni ti lihiri ba ka zaɣisi ba sɔɣibu, ka bɛ ni do nimaani dabisi’ muna ata ni pirigili.
Di saha maa ka anabinim’ ayi maa daa wum ka kukol’ shɛli yi zuɣusaa na n-yɛri ba, Dumiya kpe na! Ka bɛ daa kpe sagban’ ni n-du alizanda ni bɛ dimnim’ maa ninni.
Ka tiŋgbani daa dam pam, ka tiŋ’ maa yiya pia kam puuni zaɣ’ yini lu, ka ninvuɣ’ tusaayopɔin daa kpi tiŋgbani dambu maa ni, ka dabiɛm gbahi bɛn kpalim, ka bɛ ti Naawuni ŋun be alizanda ni ŋɔ jilima.
Di saha ka malaika ŋun pah’ ayopɔin la piɛb’ o kikaa, ka kukol’ kara kul kuhiri pampam alizanda ni yɛra, “Dunia nam leela ti Duuma Naawuni min’ o Masia dini hal ni saha din ka bahigu!”
Zuliya kam je suli, ka a gba suhu yiɣisi. Ka saha paai ni a kari kpiimba saria, ka bahi bɛn saɣindi dunia la yoli. Ka saha lan paai ni a zaŋ laara ti a daba bɛn nyɛ anabinim’ mini ninvuɣ’ gahinda ni tarimba mini wɔɣira bɛn zɔr’ a la.”
Di saha maa ka Naawuni jɛmbu duu din be alizanda ni la daa yooi ka o Daalikauli Adaka la be di puuni; ka saa daa nyaɣisiri ka tahira, ka vuri yiɣisi mɔni ka tiŋgbani damda, ka sakuɣ’ kara luri na.