Zot ena lotorite pou ferm lesiel, pou anpes lapli tonbe osi lontan ki zot pe transmet mesaz Bondie; zot ena lotorite pou sanz dilo, fer li vinn disan, e pou atak later avek toutsort kalite fleo, kan e ler zot anvi.
Anmemtan ti ena enn gran tranblemandeter, e enn diziem lavil ti kraze net; set mil dimoun ti mor dan tranblemandeter. Bann sirvivan ti terifie e zot ti pe glorifie Bondie lesiel.
Lerla setiem anz soufle so tronpet, e ti ena bann lavwa bien for dan lesiel ki ti dir, “Asterla rwayom lemonn finn rant anba pouvwar Bondie nou Segner ek so Mesi. Li pou regne pou touzour.”
Bann nasion ti araze, me asterla to lakoler ki pe manifeste, enn moman zizman pou bann mor, enn moman rekonpans pou bann profet ki servi twa, pep ki konsakre pou twa, e tou bann ki respekte to nom, so gran kouma so tipti, e pou detrir bann ki detrir later.”