Jare ime mbae uyekuaa ara re chepɨakañɨete jese wae. Jae ko pëti kuña warasɨ pe uyemonde rami. Jare kuña ipɨ íɨwɨ pe oï yasɨ. Jare doce yasɨtata reta onoi iñäka re icoronarä.
Jare uyekuaa ïru mbae ara re chepɨakañɨete jese wae. Jae ko pëti teyu wasu pɨ̈ta wae dragón jei chupe wae. Jae onoi chiu iñäka jare payandepo jäti reta. Jare pëti pëti iñäka re onoi corona.
Jayawe Miguel jare iaraɨwa reta omombo jokua dragón ara wi ɨwɨ pe opaete araɨwa jese uyemboya wae reta ndiwe. Jokua dragón ko jae mboi arakaete Eva umɨngeta wae. Jae ko Satanás, Añawasu yande yae chupe wae. Jae ko umbɨtawɨ opaete ɨwɨ pewa reta wae.
¡Jáeramo ara pe ma ñonoï wae reta tuyerowia! Erëi, pe reta ɨwɨ pe peï wae jare mar rupi peï wae, ¡kërái etei ndipo piporara paraweteta! Echa’ä Añawasu uweyɨ ma ara wi uyembowaicho waerä pekotɨ täta iarasɨ rewe. Echa’ä jae uikuaa michiño ma ara onoi wae.” Jukuärái jei jokua ñee ayandu wae.