Ak kitook kaborunet ne o eng’ kipsengwet; kwondo ne kiilaachi asista, ak komi arawet keldebesaikyik ng’ony, ak kimi metinnyi kutwetab kecheik taman ak aeng’.
Ak kitook kaborunet age eng’ kipsengwet; ak ogeero, maswetit ne o ne birir, ne tinyei metowek tisab ak kuinoik taman, ak kimitei metowekyik nariosiek tisabu.
Ak ichuuti katutiennyi kebeberta agenge eng’ somok ne bo kecheikab kipsengwet, ak kowirji ng’ony: ak kitonon maswetit eng’ taitab kwonyoto ne kimachei kosigis, kole si ye sigis, koam lakwet.
Ak kisich lakwet ne werit, ne tun bou bororiosiek tugul eng’ koroktab karnet: ak kigimut lakwennyi kwo ole mi Jehovah, agoi ng’echerennyi ne bo laitornatet.
Ak kigiturur maswetinoto o konyo ng’ony, erenet ne bo keny, ne kiguure Oindet ak ko Setani, kaberberindetab ng’ony komugul; kigiturur konyo ng’ony, ak kigiturur malaikaisiekyik koboto inendet.
Ak kiagas kutit ne o eng’ kipsengwet, kole, Kagonyo nguno yetunet, ak kamuktaet, ak bounatetab Jehovah nenyo, ak kimnatetab Kristo nenyi: amu kagetururto kataamindetab che kitupche kwo ng’ony, ne itaami ichek eng’ taitab Jehovah nenyo bet ak kemoi.
Noto anyun oboiboitu, okwek kipsengwetisiek, ak okwek che omenye oloto. Bwa agobo ng’ony ak nyanjet: amu kachorgei oindet konyo ole omi, kotinyei nereknatet ne o, amu ingen kole tinyei betusiek che ng’ering’ kityo.
Ak kigigochi kwonyoto kebebaik aeng’ che bo kipsichit ne o, si kobiit kotirirene kwo ong’atet agoi oldanyi, ole kibae, eng’ betusiek, ak betusiek alak, ak kebebertab betusiek, koistoegei togetab erenet.
Ak kinerekyi maswetit kwonyoto, ak kwo kobargei ak keswekyik che king’et, che ribei ng’atutikab Jehovah, ak kotinyei baornatetab Jesu: ak kitonone ng’aniekab nyanjet.