जब उ खत्म हो ग्यो, तब आकाश में अद्धभुत चिन दिखाई दीछ, एक स्यैनिमैंसी चाँद में ठाड़ हो भेरन प्रगट भैछ जैले इसा कपाड़ा पैनिना छ्या जो सूर्य का जसा चमक छ्या, उले अपून ख्वारा में एक मुकुट पैनिना को छ्यो जैमें बार तारा छ्या।
उले आकाश का एक तिहाई तारान अपून पूछड़ा ले खींचभेरन धरती में खित दीयान। और उ अजगर उ गर्भवती स्यैनि का सामुनि ठाड़ हो ग्यो ताकि उक नन्तिनो हुनै ऊस खा जौ।
तब उ स्यैनि ले एक च्याला स जन्म दीछ लेकिन ऊस अजगर नै खा सक्यो किलैकी ऊस तुरन्त छीन ली ग्यो और परमेश्वर और उक सिंहासना का पास ल्याई ग्योछ। उ लड़का एक लूवाक दण्डा लीभेरन सब लोगून में राज करोलो।
फिर स्वर्ग में लड़ाई भैछ, परमेश्वरा का खास स्वर्गदूतून में भटे एक ले जैको नाम मीकाईल छै, अपून अधीन रूनवाला स्वर्गदूतून का दगाड़ अजगर में हमला करछ्य। और अजगर और उक दुष्ट दूतून ले मीकाईल का खिलाफ लड़ाई लड़छ्य,
येक कारण ऊस और उक दुष्ट दूतून धरती में खित दीछ। यो ठूलो अजगर, उई छै जो भौत पैलि स्याँपा का रूप में दिखाई दीछ, जैस शैतान या दोष लगून वालो ले कुंनान। यो उई छै जो यो संसारा का लोगून ध्वाका दीनै आर्योछ।
फिर मैंले स्वर्ग भटे कैसे जोरले यो कुंन सुणछ्य, “अब हमोरो परमेश्वर अपून लोगून बचाल! और अब उ अपूनी सामर्थ को इस्तमाल करोलो और राजा की नियाती राज्य करोलो! अब उनोरो मसीह संसार में अपूनो अधिकारो को दावा करोलो! अब शैतान हमार परमेश्वरा का सामुनि ठाड़ हो भेरन हमार दगाड़ का भाईन में दिन-रात दोष नी लगालो। क्याखिनकि ऊस स्वर्ग भटे भ्यार खित दी हैछ।”
उनून उ मेम्ना का खून की सामर्थ ले हराछ। जो उनून उनार पापून छुड़ून खिन मर गैछ्यो। उनूनले ऊस हरा दीछ किलैकी उन यो कुंनै रियान कि मेम्ना उनोरो परमेश्वर छै। याँ तक कि मार डाली ग्यान, लेकिन उन यो कुंन है पछिल नै हटिया।
येक कारण तुम सबून खुश हुन चैछो जो याँ स्वर्ग में रूनान। लेकिन तुम जो धरती में छा और जो समुद्र में छा, तरस खायी जान चैछो किलैकी शैतान तुमार पास तलि आग्योछ, और उ भौत गुस्सा में छै क्याखिनकि उ जाणछो कि उको पास काम करून खिन ज्यादा बखत नाहातिन।
लेकिन उ स्यैनिमैंसी परमेश्वरेले एक ठूला उकाब का द्वी पंख दीई ग्यान, ताकि उ जाग भटे उड़ जौ जो बिरान जागा में उ जाग तैय्यार करिना की छी। वाँ साढ़े तीन साल तक उकी देखभाल करि ग्यो ताकि अजगर उक पास नै पुज सको।
तब अजगर उ स्यैनि खिन गुस्सा भ्योछ, येक कारण उले स्यैनि का सन्तानून का बिरोध में लड़ाई घोषणा करछ्य। मतलब उन लोगून का खिलाफ जो परमेश्वरा का हुकमून मान्नान और यीशु का द्वारा सिखाईना का बातुन में मजबूतीले बनिना का रूनान।