Ondaka ttodem man upral pe chisai e moraki, ta dikklem kai likela katar e mora iek azdava kai saia la efta sore ta des singa, ta ande lake singa des korone ta upral pe lake sore, iek anau kai kusel e Devle.
Ta o dragon kai dikklem saia sargo o leopardo; ta leke porrne sea sargo e melledoke, ta leko mui sargo mui lionoko, ta o dragon dia la pi zor ta po trono ta baro gazdaripe.
Ta blagosisarde la sa e llene kai zivin pe ppuv, gola kai lenge anava inai pisime ando lil katar o zivoto e Bakreko, kai saia dino kurbano mai anglal katar gava sueto.
“Vareko te si te ppangliol ka llal ppanglo; a vareko te mundarela e jarniea, e jarniea morabi te avel mundardo.” Kate si o terpipe ta o pachape katar o santo foro.
Ta si la sa o gazdaripe katar e purvi azdava, ta gazdaril angla la ta cherel e ppuv ta e llene kai zivin pe late te blagosin e purve azdava kai lako ranipe merimako te sastiloia.
Ta kojavel e llenen kai zivin pe ppuv e bare ezgodenchar kai si lake dino te cherel angla e azdava, ta cherel e llenen kai zivin pe ppuv te cheren iek eslika e azdavaki kai si ranime e jarnietar ta kai zivisarda.
Ta cherela saurren e minonen ta e baren, e barvalen, ta i e chorren, e eslugen ta i gola kai inai esluge te avel lenge ttodi iek marka pe lengo chikat.