Ka emišwa lešing la lewatle. Ka bona mo lewatleng go rotoga sebata sa dihlogo tše šupago le dinaka tše lesome. Mo dinakeng tša sona go be go na le maina a go roga Modimo.
Sebata seo ke se bonego se be se swana le nkwe; marofa a be a swana le a tawana; molomo o be o swana le wa tau. Mme noga ya se fa maatla a yona, le sedulo sa bogoši bja yona, le bogoši bjo bogolo.
Ka bona e nngwe ya dihlogo tša sona eke e gobetše wa go bolawa; fela, ntho yeo e bego e iša lehung, ya fodišwa; lefase ka moka la tlabega, la šala sebata morago.
Se tlo lotšhwa ke bohle ba ba agilego lefaseng, bao maina a bona a sa kago a ngwalwa pukung ya bophelo ya Kwana ye e hlabilwego, ba ngwalwa go tloga go theweng ga lefase.
E a gapago mathopša, le yena o tlo ya bothopša. E a bolayago ka lerumo, le yena o tlo bolawa ka lerumo. Ke moo go nyakago kgotlelelo le tumelo ya bakgethwa.
Se tla se dira maatla ka moka a sebata sa pele, sona se lebeletše; se dira gore lefase le ba ba agilego mo go lona ba lotšhe sebata seo sa pele, se se fodilego ntho ya sona e bego e iša lehung.
Ba ba agilego lefaseng se ba aroša ka mehlolo ya sona ye se dumeletšwego go e dira pele ga sebata sela. Se botša ba ba agilego lefaseng se re: Sebata seo sa ntho ya lerumo se se boetšego sa phela, ba se betlele seswantšho.
Sona se fiwa maatla a gore seswantšho seo sa sebata sa pele se se fe bophelo, seswantšho seo se bolele, sa be sa kgona go bolaiša ba ba sa khunamelego seswantšho sa sebata.
Se kgona gore batho bohle, ba banyane le bagolo, bahumi le badiidi, bahunologi le bahlanka, ba swaiwe ka leswao seatleng se setona le ge e le phatleng,
Moo go nyaka bohlale; e a nago le tlhaologanyo a a hlathe palo ya sebata, gobane ke palo ya motho. Palo ya sona ke makgolo a selelago a nago le masome a selelago a metšo e selelago.