Erio nkarigereria, nkarora Emanwa y’Eng’ondi oteneine ase egetunwa gia Sayoni, na amo nere abanto chilifu rigana erimo na emerongo ene na inye (144,000) abaare nerieta riaye amo neria Ise riarikire ase amasio abo igoro.
Aba nabwo batesoetie ase ogotacheneka nabakungu, ekiagera barabwo nabekungi, naende bagotunyana Emanwa y’Eng’ondi kera aase ase akogenda. Aba nababooretigwe korwa ase mwanyabanto buna ogotongorwa ase Nyasae na ase Emanwa y’Eng’ondi,
Erio nkarora omomalaika onde okoiruruka igoro gati. Oyo nigo arenge nenchili ya kare na kare okorareria abwo bamenyete ase ense, ase kera egesaku, na eamate, na omonwa, na abanto.
Ere agateba neriogi rinene, “Moiroke Nyasae na komotogia, ekiagera ensa yaye y’okogambia yaikire, mosasime ere oyotongete igoro na ense, na enyancha, ne chinsoko chi’amache.”
Na omomalaika onde, oyo o gatato, akabatunyana, ogoteba neriogi rinene, “Omonto karasasime eng’iti eria na omogwekano oye, na kobekwa ekemanyererio ase obosio bwaye igoro, gose ase okoboko kwaye,
ere nanywe edivai y’endamwamu ya Nyasae yaroisigwe, etasang’aniri kende, ase egekombe ki’endamwamu yaye. Naende nachandwe nomorero na ekebiriti ase amasio ’abamalaika abachenu, na ase obosio bw’Emanwa y’Eng’ondi.
Na erioki ri’okoyia kw’abwo bagochandeka nigo rirachongororoke gochia igoro goika kare na kare. Na ogotimoka tikori omobaso gose obotuko ase abwo basasimete eng’iti eria na omogwekano oye, na kera oyonyorire ekemanyererio ki’erieta riaye.”
Erio nkarigereria, nkarora riire rirabu, na igoro ase riire riria naikaranseteo oyomo ogwekaine omwana o mwanyabanto, orenge negutwa y’etahabu ase omotwe oye, na omoyio okogesa ase okoboko kwaye.