Ak kinyo age eng’ malaikaisiechato tisab che kitinyei tabok tisab, ak konyo kong’alalwa, kole, Nyo yu, si aborun kiruogetab chepkugoniot ne o ne tebe beek che chang’;
Ak kiimuta eng’ Tamirmiriet agoi surkwen: ak kiageer kobogoriot kotebe tiondo ne birir, ne nyiitat kainaikab chubisiet, ne tinyei metowek tisab ak kuinoik taman.
Ak kiilaachi kobogoriot ngoroik che arusen ne birir ak che biriren, ak kigilelesonjine tahabu ak koik che bo kamanutiet ne o mising’ ak sonoek che kororon, ak kotinyei eng’ eunnyi kikombet ne bo tahabu ne nyiitat tuguk che kiwechei, tugukab simdo che bo soksennyi,
Ak kiageer kwonyoto ko kagobogit eng’ korotikab bik che tililen, ak eng’ korotikab baorinikab Jesu. Ak ye kingageer inendet, akwong’ eng’ kwong’et ne o.
Ak kilenja malaikaiyat, Kekwong’ amu nee? Amache amwaun ung’otietab kwonyito ak ne bo tiondo ne keseni inendet, ne tinyei metowek tisab ak kuinoik taman.
Tionyi kegeere komi, ama komi; ak ko negit komong’ eng’ keringet ne maigoksei, ak kwo luset. Ak kwong’dos ichek che menyei ng’ony, che kima kisirji kainaikwak bukuitab sobondo koboch ngab kelumda ng’ony, ye keer tiondo, amu kimi, ama komi, ak kota konyonei.
Ak kuinoichoto taman che kegeer ko laitorinik taman che tom konam bounatet; ak konyoru kimnatet ko u laitorinik, koboto tiondo, eng’ boroindab sait agenge.
Baregei chuto ak Aruet ak koterter Aruet ichek, amu inendet ko Kiptaiyatab kiptainik, ak ko Laitoriatab laitorinik; ak icheget che mi koboto inendet, che kigiguur ak che kigilewen ak che kiyani.
Ak kuinoichu kegeere taman, ak tiondo, ko tun wechei chepkugoniot, ak kometo kotebi inegei, komi ach ngor, ak koam banyekyik, ak kobeel inendet eng’ mat kogesgei.