Ki nyo age eng' malaikaisyechooto tisap che ki tinyei taabook tisap, ak konyo kong'alaalwo, kole, “Nyoo yu, si aboorun kirwoogetap chepkugoniot ne oo ne tebee peek che chaang';
Ara ki imuta eng' Kabuuset ne Tiliil agoi surkwen: ak ki ageer kobogoryot kotebee tyondo ne piriir, ne nyiitaat kainaigap chubisyet, ne tinyei metowek tisap ak kuinoik taman.
Ak ki ilaachi kobogoryot ngoroik che arusen ne piriir ak che piriireen, ak ki kilelesanjine thahabu ak koik che po kamanuutyet ne oo miising' ak sonoek che korooron, ak kotinyei eng' eunnyi kigombet ne po thahabu ne nyiitaat tuguuk che kiwechei, tuguugap simdo che po soksennyi,
Ak ki ageer kwonyooto ko kagobogit eng' korotiigap piik che tiliileen, ak eng' korotiigap paorinigap Jeso. Ye kinga keer ineendet, akwong' eng' kwong'eet ne oo.
Ak ki leenjo malaikaiyat, “Kekwong' amu nee? Amache amwaun ung'ootyetap kwonyito ak ne po tyondo ne keseni ineendet, ne tinyei metowek tisap ak kuinoik taman.
Tyonyi kegeere komi, ama komi; ak ko neegit komong' eng' keriinget ne ma igoksei, ak kwo luseet. Ak kwong'dos icheek che menyei ng'wony, che ki ma kisirchi kainaikwak bukuitap saboondo kobooch ngap kelumda ng'wony, ye keer tyondo, amu ki mi, ama komi, ak kota konyonei.
“Ak kuinoichooto taman che kegeer ko laitorinik taman che tomo konam laitornatet; ak konyooru kimnateet ko uu laitorinik, kobooto tyondo, eng' poroindap sait agenge.
Paregei chuuto ak Aarwet ak koterteer Aarwet icheek, amu ineendet ko Kiptaiyatap kiptainik, ak ko Laitoryatap laitorinik; ak icheeget che mi kobooto ineendet, che ki kiguur ak che ki kilewen ak che kiyani.”
Ak kuinoichu kegeere taman, ak tyondo, ko tuun wechei chepkugoniot ak kometo kotebi ineegei, komi aach ngor, ak koam panyeekyik, ak kobeel ineendet eng' maat kogeskei.
Amu ki inde Kamuktaindet mugulelwekwak koyai ko uu ye ibwaati, ak kosich tugul kabwaatet agenge, ak kogoochi tyondo laitornatennywa, agoi kosulda ng'aleegap Kamuktaindet.