Ephesi khuaa kohhranho tirhkoh hnênah chuan heti hian ziak rawh: ‘A kut ding lama arsi pasarih kenga, rangkachak khâwnvâr dahna pasarih zînga vei veia khân hêng thu hi a sawi a ni:
I thiltih te, i thawh rimzia leh i chhelzia te, mi sual i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a;
Chutichuan, i tlûksan tâk chu hre reng la, simin, a tîra i thiltihte kha ti leh rawh; chuti lo chuan, i hnênah ka lo kal ang a, i sim loh zawngin i khâwnvâr dahna kha a hmun ata ka sawn ang.
I hrehawmzia te, i pachhiatzia te (nimahsela, i hausa si a), Juda tak ni lova, Setana inkhâwmna inho ni zâwk sia, Juda intihoten an sawi chhiat dân che ka hria.
I tuar tûrte hi hlau suh; ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh; tichuan, nunna lallukhum ka pe ang che.
I awmna, Setana ṭhutphah awmna kha ka hria; tin, ka hming i vawng tlat a, ka thu hretu Antipa, Setana awmnaa in zînga an thah, ka mi rinawm tak awm lai meuh pawh khân mi rinna hi i phatsan lo bawk a.
Nimahsela, tlêmin demna che ka nei, khata Balaama zirtîrna thu pawm tute emaw in awmpui avâng khân; ani chuan milem biakna sa an eina tûr leh an inngaihna tûrin, Balaka chu Israela thlahte hmaah tlûkna dah a zirtîr kha.
Thlarauvin kohhranho hnêna thu a sawi hi beng nei chuan hre rawh se. A hnehtu apiang hnên ngeiah chuan manna thuhrûk zînga mi ka pe ang a, lung vâr pawh ka pe ang, chumi lunga hming thar ziak nên; chu hming chu a changtu chauh lo chuan tu mân an hre lo, a ti e,’ tiin.
Tin, Thuatira khuaa kohhranho tirhkoh hnênah chuan heti hian ziak rawh: ‘Pathian Fapa, mit mei alh ang neia, a kephahte dâr tle mi anga khân hêng thu hi a sawi a ni:
I thiltih te, i hmangaihzia te, i rinzia te, i rawngbâwlzia te, i chhelzia te ka hria, i thiltih hnuhnûng berte chu a tîra mi ai khân a nasa zâwk tih ka hre bawk.
Nimahsela, demna che ka nei, hmeichhia Jezebeli, zâwlneinu intii kha i ngaihtheih avângin; ani chuan ka bâwihte chu inngaih leh milem biakna thil ei zirtîrin a hruai bo bawk ṭhîn a ni.
A fate chu hriin ka tihlum bawk ang a; tichuan, kei hi rilru leh thinlung entu ka ni tih kohhranho zawng zawng chuan an hria ang; tin, in thiltih ang zêlin ka pe ṭheuh ang che u.
Nimahsela, nangni, Thuatira khuaa mi dang awm, chu zirtîrna thu pawm lova, Setana thil thûk an tihte hre lo apiang hnênah chuan, phurrit dang rêng ka bel lo vang che u, ka ti a ni.
Tichuan, a hnehtu apiang leh a tâwp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtîr ang; tin, anni chuan bêlvawtu bêlte keh sawm depa a awm angin, thîr tiangin an ro a rêlsak ang.