Kɑ leeng yij ölø kì thɑ piny yi wëywönɑni, kɑ dhøg ölø dije, kɑ gø thɑnye ki kitim dij, o cöge e pödhh pɑ wënye ki runn ɑ́lïp ɑ́kyel. Codhe, o ókɑl ki gønyø keny-ɑ óthumi runnɑni.
Kɑ yɑ ólïdhø ki kwømm wɑ̈thi gen dɑ tyëng-ɑ ɑ́kwɑny gɑ jɑggi gøny. Kɑ wëyi tyëng-ɑ ɑ́nɑ̈g kipe kɑ ɑ́töng gen dyër men-ɑ ɑ́nyodh yi Yëso, kí kwøbbi Jwøk, lidhɑ thyew. Lɑ̈y nuti mɑlli gen, o ngïje nuti mɑlli gen, o bøli gen wɑlɑ̀ cinggi gen nuti dïjjø ki ngïji lɑ̈yɑni. Ge ɑ́dwöög be nënnø kɑ ge ojyɑ̈gø kyeel ki Mesiy ki runn ɑ́lïp.
Tyëng-ɑ ɑ́kwöngi ki dhwödhi mɑl kì yij thøø ri gen dɑ gyëdh mø døngø. Ryeew thøø yïe bong tegø kì kömi gen; de ge óbëëdø gɑ ókwërri Jwøk geki Mesiy; o ge ójyɑ̈ɑ̈gø kyeel ki Mesiy ki runn ɑ́lïp.
O ókedhi be wënyi pödhh-ɑ wɑ̈thi tùngi piny gɑ ɑ́ngwen; gen ɑ Gög kí Mɑgög. Ge ókɑ̈ɑ̈l be liny yi Cethɑn; o ge óbï kwɑnni gen nɑ nyingi ɑyejø kì thɑ̈ngi nɑɑm omelø.