Aracoka arambîîra, “Bûkûûjûra! Nî ni Alfa na Omega, nî ni kîambîrîria na nî ni mûthia. Ûrîa ûrî na nyoonta nkamûkundia rûûjî kuuma kîthimeene kîa rûûjî rwa ûtûûro na ntîmûrîyia.
Îndî antû barîa iguaa na aregi gwîtîkia na barîa baikinyangîte na mantû jamathûûku na ooragani na atheria na arogi na arombi mîrungu ya mîng'uanano na arongo bonthe, bakagerwa îrieene rîrîa rîakanaga mwanki jwa ûbiriti; na kîu nîkîo gîkuû kîa biîrî.”
Nthingo cia ntûûra îîu ciaarî inene na indaaja. Yaarî na mpingîro îkûmi na ijîîrî na o mpingîro nî yaakarîtue nî mûraîka ûmwe. Ningî o mpingîro nî yaandîki riîtwa rîa mwîrîga jûmwe jwa îrîa îkûmi na îîrî ya Israeli.
O rûteere rûmwe rwa ntûûra îîu rwaarî na mpingîro ithatû: rûteere rwa bwa gaiti rwaarî na ithatû na rûteere rwa bwa ûrîo rwaarî na ithatû na rûteere rwa bwa ûmotho rwaarî na îthatû na rûteere rwa bwa rûgûrû rwaarî na ithatû.
Rûthingo rwa ntûûra îîu rwaaki mûsingiine jwa maiga îkûmi na jaîrî na o iiga nî rîaandîki riîtwa rîa mûtûmwa o ûmwe wa barîa îkûmi na baîrî ba Gatûrûme.
Nteere cio inya cia ntûûra îîu ciang'aneene o ûmwe. Mûraîka ûu arathima ntûûra îîu na rûturo rwaawe: yaarî na ûraaja bwa kilomita ngiri ijîîrî na magana jana (2,400km), na waariî na gwitia bwa îgûrû bwa ntûûra îîu bwang'anene na ûraaja bwaayo.
Maiga ja mûsingi jwa nthingo cia ntûûra îîu jaagemetue na twiga twa goro twa mîthemba yonthe: iiga rîa mbere rîagemetue na tuiga tûtûtuune twîtagwa jasipa na rîa jaîrî rîagemetue na satire inthongi cia rangi ya wiirû bwa îgûrû, na rîa jathatû rîagemetue na îra rîrîa rîerû buru rîtagwa agate, na rîa jana rîagemetue na emeradi îrîa nthongi.
Iiga rîa jataano rîagemetue na tuiga twîtagwa saridoniki, na iiga rîa jatantatû rîagemetue na twiga twîtagwa akiki îrîa ntuune ta nondo, na iiga rîa mûgwanja rîagemetue na twiga twîtagwa kîrisolito na iiga rîa janaana rîagemetue na twiga twîtagwa berili, na iiga rîa kenda rîagemetue na twiga twîtagwa topazi, na iiga rîa îkûmi rîagemetue na twiga twîtagwa kirisoparaso, na iiga rîa îkûmi na rîmwe rîagemetue na twiga twîtagwa jasinto tûtûtuune ja macunkwa jamaguundu, na iiga rîa îkûmi na jaîrî rîagemetue na twiga tûrîa twîtagwa amethisto.
Nacio mpingîro iu îkûmi na ijîîrî ciaarî cia maiga ja goro ja mîthemba îkûmi na îîrî, o mpingîro yaathithîtue na iiga rîa goro rîa mûthemba jûmwe. Njîra ya ntûûra îîu yaarî ya thaabu întheru, înkembûku ta kîoo.