×

Marwari Bible

प्रकाशित-वाक्‍य 21

1
पछै म्हैं नवो आभौ अर नवी धरती नै देख्यां, क्यूंकै पैला आभौ अर पैली धरती जाती री ही, अर समंदर भी नीं रियौ।
2
पछै म्हैं पवितर नगर नवे यरुसलेम नै सरग ऊं परमेसर रै खनै उतरते देख्यौ। वो उण बींदणी रै ज्यूं ही जिकौ आपरै बींद रै लियै सिंगार करयौ हो।
3
पछै म्हैं सिंहासण में ऊं किणी नै ऊंची आवाज ऊं ओ कैवतै सुण्यौ, “देख, परमेसर रौ डेरो मिनखौ रै बीच में है। वो उणरै साथै डेरो करैला, अर वे उणरा लोग होवैला, अर परमेसर आप उणौरै साथै रैला अर उणौरौ परमेसर होवैला।
4
वो उणौरी आंख्यां ऊं सगळा आंसू पोंछ दैला। अर इणरै पछै मौत नीं रैला, अर नीं सौग, नीं विलाप, नीं पीड़ा रैला। पैली बातां जाती रीं।”
5
जिकौ सिंहासण माथै बैठौ हो, उणै कयौ, “देख, म्हैं सगळौ नवो कर देवूं हूं।” पछै उणै कयौ, “लिख ले, क्यूंकै ऐ वचन विसवास रै योग्य अर सत्य है।”
6
पछै उणै म्हारै ऊं कयौ, “ऐ बातां पूरी होयगी है। म्हैं अल्फा अर ओमेगा, सरूआत अर आखरी हूं। म्हैं तिरसे नै जीवन रै जळ रै झरनै में ऊं मुफत में पिलाऊंला।
7
जिकौ जय पावैला वोहीज इण चीजों रौ वारिस होवैला, अर म्हैं उणरौ परमेसर होवूंला अर वो म्हारौ बेटौ होवैला।
8
पण डरपोको, अर अविसवासियो, अर घिनौनों, अर हत्यारो, अर व्यभिचारियो, अर जादू-टोणा करणवाळा, अर मूरती पुजारियो, अर सगळै झूठौ रौ भाग उण झील में मिळैला जिकौ अग्‍नि अर गन्धक ऊं बळती रैवै है। आ दूजी मौत है।”
9
पछै जिण सात सरगदूतो रै खनै सात आखरी विपतियां ऊं भरयोड़ा सात कटोरा हा, उणमे ऊं एक म्हारै खनै आयौ, अर म्हारै साथै बातां करनै कयौ, “एठै आ, म्हैं थनै बींदणी यानि उनियां री लुगाई दिखाऊंला।”
10
तद वो दूत म्हनै परमेसर री आतमा में एक मोटे अर ऊंचै भाखर माथै लेय ग्या, अर पवितर नगर यरुसलेम नै सरग ऊं परमेसर रै खनै ऊं उतरते दिखायौ।
11
परमेसर री महिमा उणमे ही, अर उणरी जोत अनमोल भाठौ, अरथावूं बिल्लौर रै कांच री ज्यूं यसब री नाई साफ ही।
12
उणरै च्यांरूमेर एक मोटी अर ऊंची दीवार ही, अर उणरै बारैह फाटक अर फाटको माथै बारैह सरगदूत हा। अर उण फाटको माथै इजरालियो रै बारैह गोत्रों रा नाम लिखयोड़ा हा।
13
पूरब री तरफ तीन फाटक, उतर री तरफ तीन फाटक, दक्‍खिण री तरफ तीन फाटक, अर पच्छिम री तरफ तीन फाटक हा।
14
नगर री दीवार नींव रै बारैह भाठौ माथै खड़ी ही, अर उण माथै उनियां रै बारैह प्रेरितों रै बारैह नाम लिखयोड़ा हा।
15
जिकौ दूत म्हारै साथै बातां कर रियौ हो, उणरै खनै नगर अर उणरै फाटको अर उणरी दीवार नै नापणै रै लियै एक सोने रौ गज हो।
16
वो नगर चौकोर बणयोड़ो हो अर उणरी लम्बाई, चौड़ाई रै बराबर ही। अर उणै उण गज ऊं नगर नै नापयो, तो साढ़ै सात सौ कोस निकळौ। उणरी लम्बाई अर चौड़ाई अर ऊंचाई बराबर ही।
17
सरगदूत उण दीवार नै मिनख रै हाथ रै नाप ऊं नापयो, तो एक सौ चौवालीस हाथ निकळी।
18
उणरी दीवार यसब री किमती भाटे ऊं बणी ही, अर नगर ऐड़ै सुद्ध सोने रौ हो जिकौ साफ कांच रै ज्यूं हो।
19
उण नगर री नींवों हर तरैह रै किमती भाठौ ऊं सजायोड़ी ही। पैली नींव यसब री, दूजी नीलमणि री, तीजी लालड़ी री, चौथी मरकत री,
20
पांचवी गोमेदक री, छठी माणिक्य री, सातवी पीतमणि री, आठवी पेरोज री, नवी पुखराज री, दसवी लहसनिए री, ग्यारहवीं धूम्रकान्त री, अर बारहवी याकूत री ही।
21
बारैह ही फाटक मोतियो रा हा। एक एक फाटक एक एक मोती रा बण्या हा। नगर री सड़क साफ कांच रै ज्यूं सुद्ध सोने री ही।
22
म्हैं उणमे कोई मिंदर नीं देख्यौ, क्यूंकै सर्वसक्तिमान परभु परमेसर अर उनियां उणौ रौ मिंदर है।
23
उण नगर में सूरज अर चांद रै उजाळै री जरुरत कोनीं, क्यूंकै परमेसर रै तेज ऊं उण में उजाळौ व्‍है रियौ है, अर उनियां उणरौ दीयौ है।
24
जाति जाति रा लोग उणरी जोत में चालैला-फिरैला, अर धरती रै राजा अपणै अपणै तेज रौ सामान उणमे लावै ला
25
उणरा फाटक दिन में कदैई बंद नीं होवैला, अर रात उठै नीं होवैला।
26
लोग जाति जाति रै तेज अर धन-दोलत रौ सामान उठै लावै ला।
27
पण उणमे कोई अपवितर चीज या भूंडा कांम करणैवाळा, या झूठ गढ़नेवाळा किणी रीत ऊं परवेस नीं करैला। पण कैवल वे लोग जिणरै नाम उनियां रै जीवन री किताब मांय लिखयोड़ा है।
Marwari Bible
NLCI CC BY-NC-ND 4.0
:
नोट सहेजें