Penepo, ndabva fala ikulu ikhabuluka ku mpando wa umambo, mbikhalonga na mphambvu kuti: “Cincino khumbi ya ntsembe ya Mulungu iri na anthu! Mulungu anakhala na iwo. Iwo anakhala mbumba yace. Iye ene Mulungu anadza kakhala na iwo [pontho anadza kakhala Mulungu wawo. ]
Andipanga pontho tenepa: “Pyamala kucitwa. Ine ndine Alufa na Omega, ndine Wakutoma na Wakumalisa. Kuna ule ana nyota, Ine ndinadza kampasa pezi mbamwa mphuno ya madzi a upulumuki.
Ukhali na mpanda ukulu wakulapha, na misuwo mikulu khumi na miwiri, pontho pakhali na anju khumi na ziwiri, m'bodzi na m'bodzi mbakhalimira pa nsuwo wace. M'misuwo mukhadalembwa madzina a madzindza khumi na mawiri a ana a Izarayeli.
Ku mabulukira dzuwa, kukhali na misuwo mikulu mitatu. Ku khundu ya kubangwe, kukhali na misuwo mitatu. Ku madokera dzuwa, kukhali na misuwo mitatu na ku khundu ya mbalu kukhali na misuwo mitatu.
Mpanda wa nzinda ukhadamangwa padzulu pa myala khumi na miwiri. Pa mwala ubodzi na ubodzi, pakhadalembwa dzina ibodzi ya apoxtolo khumi na awiri a Mwana Bira.
Nzinda ukhali na makhundu manai. Ulaphi wace na ugugumi wace ukhali sawa-sawa. Iye aupima nzinda na mpsimbo yace. Ulaphi wace ukhali wa pikwi piwiri na madzana mawiri anacemerwa makilometuru ncizungu. Ugugumi wace na cengo cace, pikhali sawa-sawa na ulaphi wace.
Myala ikhatsidzikira mipanda ya nzinda ikhadabalikiswa na myala yakubalika yakusiyana-siyana. Mwala wakutsidzikira wakutoma ukhadabalikiswa na myala inacemerwa djaxpe. Mwala wakutsidzikira waciwiri ukhadabalikiswa na myala ya safira. Wacitatu ukhadabalikiswa na myala ya kalisedhonya. Wacinai ukhadabalikiswa na ejimiradha.
Mwala wakutsidzikira wacixanu ukhadabalikiswa na myala ya saridhonyo, wacitanthatu na myala ya saridhyo, wacinomwe na myala ya kirizolito. Mwala wakutsidzikira wacisere ukhadabalikiswa na myala ya bherilo, wacipfemba na myala ya topazyo, wacikhumi na ya kirizoparazo. Wacikhumi na ubodzi ukhadabalikiswa na myala ya jasintu, wacikhumi na miwiri ukhadabalikiswa na myala ya ametixta.
Misuwo mikulu khumi na miwiri, ikhali ya myala yakubalika inacemerwa perola. Nsuwo ubodzi na ubodzi, ukhadacitwa na mwala ubodzi basi. Nseu ukulu kakamwe wa nzinda, ukhali wa oro wakukhonda kubvungazwa, wakuphenekera ninga vidhuru.
Mwenemu cipo munadza kapita cinthu cakukhonda kuceneswa, peno kupita unango anacita pyakunyanyasa peno pyauthambi. Mbwenye anafuna pita mwenemu ndi ale basi a kuti madzina awo alembwa mu Bukhu ya Upulumuki ya Mwana Bira.