Mo mekgotheng ya gona, ka mošono le mošola wa noka, go sehlare sa bophelo sa go enywa dienywa tše lesome la metšo e mebedi; se enywa dienywa ka kgwedi e nngwe le e nngwe. Mme matlakala a sehlare seo ke a go fodiša ditšhaba.
Go ka se ke gwa ba le bošego, go ka se hlokwe lebone le seetša sa letšatši, gobane Morena Modimo o tlo ba ediša, mme ba tlo buša go iša mehleng ya neng le neng.
A bolela le nna a re: Ditaba tše di a botega, ke tša go rereša. Morena Modimo wa meoya ya Baporofeta o romile morongwa wa gagwe, a bontšha bahlanka ba gagwe tša go tlo direga ka bjako.
Yena a re: Hle lesa go realo; nna ke mohlanka boka wena, ke etša wene le bana beno ba baporofeta le ba ba gomarelago ditaba tša puku ye. Khunamela Modimo.
Ba lehlogonolo ke bao ba hlatswago diaparo tša bona, ba ya ka melao ya Gagwe gore e be ba go tlo dumelelwa sehlare sa bophelo, ba tsene motseng woo ka dikgoro.
Nna Jesu ke romile morongwa wa ka, gore a le tsebiše ditaba tše, gore di tsebje diphuthegong. Ke nna modu wa Dafida le moloko wa gagwe; ke nna naledi e phadimago ya meso.
Mang le mang e a kwago mantšu a porofeto ya puku ye ke mo tiišetša ke re: Ge motho a ka ekeletša taba tše, Modimo o tlo mo ekeletša dikotlo tše di ngwadilwego fa pukung ye.
Ge motho a ka tloša mantšu a puku ya porofeto ye, Modimo o tlo mo amoga kabelo ya gagwe ya sehlare sa bophelo, le ya motseng o mokgethwa, le ya tše di ngwadilwego fa pukung ye.