Ngam man, siftor no a jaɓri e no a naniri koŋngol Allah, ɗowtan ngol, tuubu. To a hakkilaay, mi waran bana gujjo, a anndataa saa'i nde mi warata haa ma.
Bana nii, jaaliiɗo fuu ɓornoto limce daneeje, mi wilataa innde maako diga deftere ngeendam. Yeeso Baabiraawo am e malaa'ika'en muuɗum boo mi wi'an fakat o goɗɗo am.
“Winndan malaa'ikaajo jama'aare nuɗɗinɓe haa Filadelfiya ni'i: Ndaa koŋngol iwŋgol haa Ceniiɗo, gooŋgaajo, jogiiɗo maɓɓitirɗum Daawuda, to o maɓɓiti, walaa mo maɓɓata, to o maɓɓi boo, walaa mo maɓɓititta.
Mi anndi kuuɗe ma. Ndaa mi maɓɓiti dammugal yeeso ma, walaa baawɗo maɓɓugo ngal. Ngam koo nde semmbe ma ɗuuɗaay, ammaa a ɗowtani wolde am, a yeddaay innde am.
Mi laatinan jaaliiɗo fuu daŋraŋgal nder haykaliiru Allah am, o meetataa sottineego ton. Mi winndan innde Allah am dow maako e innde berniwol Allah am, waato Urusaliima kesol ngol jippoto asama diga Allah am. Mi winndan innde am hesre dow maako boo.