|
| 1 |
|
| Handiikira maraika w'ekigombe ky'abaikiriza ab'omuri Sarudi, oti: Ebi n'ebigambo by'Ogwo oine emitima mushanju ya Ruhanga n'enyonyoozi mushanju. Naagira ati: Nimmanya ebyawe byona: oine eiziina ry'okuba ohuriire, haza ori ofiire! |
|
| 2 |
|
| Sisiimuka ohamye ebikitsigaireho ebiri haihi kufa. Manya omu bi orikukora, tinkareebiremu kintu kyona ekihikiire kimwe omu maisho ga Ruhanga wangye. |
|
| 3 |
|
| N'ahabw'ekyo ijuka ebi waahairwe n'ebi waahuriire, obirinde kandi oyeteise. Ku oraabe otasisiimukire, ndyaija nk'omushuma, haza torimanya magingo gu ndikuhikiraho. |
|
| 4 |
|
| Kwonka omuri Sarudi okiinemu abantu bakye abatakasiisire bijwaro byabo. Abo baryagyenda naanye bajwaire ebirikwera, ahabw'okuba bakishemereire. |
|
| 5 |
|
| Orikusingura, aryajwekwa ebijwaro birikwera nkabo, kandi tindiiha iziina rye mu kitabo ky'amagara; kureka ndyarigamba butunu omu maisho ga Tata n'omu ga baamaraika be. |
|
| 6 |
|
| Oine amatu, ahurire eki Mutima arikugambira ebigombe by'abaikiriza. |
|
| 7 |
|
| Handiikira maraika w'ekigombe ky'abaikiriza ab'omuri Filadelufiya, oti: Ebi n'ebigambo by'Ogwo orikwera, ow'amazima, ogira ekikomoorozo kya Daudi; oigura, hatagire waakinga; kandi okinga, hatagire waigura. Naagira ati: |
|
| 8 |
|
| Nimmanya ebi okora: Reeba, naakuta omu maisho orwigi rwigwire, orutarikubaasa kukingwa muntu weena. Nimmanya ku ogira amaani makye, kwonka kandi okarinda ekigambo kyangye, tiwayehakana iziina ryangye. |
|
| 9 |
|
| Mbwenu reeba, ab'omu iteeraniro rya Sitaane, abeeyeta Abayudaaya, haza kunu bataribo, kureka nibabeiha, ndyabagyemesereza, baije bajuumare aha bigyere byawe, haza bamanye ku naakukunzire. |
|
| 10 |
|
| Nk'oku waarinzire ekigambo kyangye ekirikugira kiti: Gumisiriza nooyehangaana; naanye ndyakurinda, orekye kuhikwaho obunaku bw'okugyezibwa okuribaho omu nsi yoona kugyeza abagitwiremu. |
|
| 11 |
|
| Reeba, niinyija juba; hamiza kimwe eki oine, hatakaagira owaakwaka ekirunga kyawe. |
|
| 12 |
|
| Orikusingura, ndyamuhindura enyomyo y'omuri Nyaruju ya Ruhanga wangye, haza tarigirugamu n'akakye; kandi ndyamuhandiikaho eiziina rya Ruhanga wangye, n'eiziina ry'orurembo rwa Ruhanga wangye. Niyo Yerusalemu ensya, eshuuma neeruga omu Iguru owa Ruhanga wangye; mmuhandiikyeho n'eiziina ryangye erisya. |
|
| 13 |
|
| Oine amatu, ahurire eki Mutima arikugambira ebigombe ky'abaikiriza. |
|
| 14 |
|
| Handiikira maraika w'ekigombe ky'abaikiriza ab'omuri Laodikeya, oti: Ebi n'ebigambo bya Kibekwo, kareebi omwesigwa kandi ow'amazima, obutandikiro bw'ebi Ruhanga yaahangire. Naagira ati: |
|
| 15 |
|
| Nimmanya ebi okora: torikufuka kandi torikwotsya. Haakiri kuri waafukire nari okootsya! |
|
| 16 |
|
| Kwonka ahabw'okuba ori ekihorootsyo, otarikufuka nobu kwakuba okwotsya, niinyija kukutanaka, ondugye omu kanwa! |
|
| 17 |
|
| Manya noogira oti: Ndi omutungi, ngogyeire, tiinyine ki nkyenire. Haza kunu otarikumanya ku ori omunaku, ow'okugirirwa esaasi, omworo, empumi kandi ojwaire busha. |
|
| 18 |
|
| N'ahabw'ekyo ninkuhabura ku onguraho ezaabu eshemeziibwe omuriro, obone kuba omutungi; kandi n'ebijwaro ebirikwera eby'okukujweka, obone kutaitwa nshoni z'okureebwa ojwaire busha. Ongureho n'omubazi gw'okuta omu maisho, obone kureeba. |
|
| 19 |
|
| Abu nkunda mbateisa, kandi mbahana. Mbwenu gira omuhimbo, oyegarukyemu. |
|
| 20 |
|
| Reeba, nyemereire aha rwigi niinyiguza. Omuntu weena ku araahurire eiraka ryangye, yaigura orwo rwigi, niinyija kutaahamu, ndye hamwe nawe, nawe arye hamwe naanye. |
|
| 21 |
|
| Orikusingura, ndyamwikiriza kushutama naanye aha kitebe kyangye ky'obukama, nk'oku naanye naasingwire, nkashutama na Tata aha kitebe kye ky'obukama. |
|
| 22 |
|
| Oine amatu, ahurire eki Mutima arikugambira ebigombe by'abaikiriza. |
|
|
|
|