Jare che aecha wi jokua wapɨa pe uwapɨ oï wae ime onoi pëti tupapire uyembapúa oï wae ipo iyakata kotɨ. Jokua tupapire uyekuatía oï japɨpe rupi jare ikupe rupi, jare chiu wese ye uyemboya oï imboyaka pe.
Jayawe amae ye, jare ayandu jeta araɨwa reta iñee. Jare aecha jetaete ye ye araɨwa reta ñonoï. Jae reta ñonoï jokua mburuwicha iwapɨa jare irundɨ tekowe onoi wae reta jare mburuwicha reta iyɨke rupi.
Joko wi che ayandu opaete Tumpa jembiapo reta ara pe ñonoï wae, ɨwɨ pe ñonoï wae, ɨwɨwɨ pe ñonoï wae, jare mar rupi ñonoï wae reta jei: “Tuyembutuichaka jaeño mái pewa jokua wapɨa pe uwapɨ oï wae jare Owecha kuimbae taurusu wae. Opaete wae tumbutuicha jae jee jare tuipɨu reta chuwi. Jae tonoi mbaepuere opaete wae re jaeño mái pewa,” jei reta.
Joko wi jokua irundɨ mbae tekowe onoi wae reta jei: “¡Jukuärái tuiko!” Jare jokua veinticuatro mburuwicha reta uñeñono ye ɨwɨ re uñemɨmichi rewe jare umbutuicha reta ikoño mái wae jee.