Mapalal katar gala ezgode, dikklem star suechura pe porrne pe star riga e ppuviake, ta achavena e star balavia te na ppurdel ni iek balau pe ppuv ni pe mora ni pe nisavo kas.
Ta i dikklem aver suecho kai likela katar likel o kkam, ta saia le o sello katar o Del o llundo ta urkisarda bare avazea pe star suechura, gola kai saia lenge dini e zor te zatrin pe ppuv ta pe mora,
Mapalal katar gala ezgode dikklem iek baro sueto kai niko nasti llinela le; sea katar sa e ppuvia, viche, forura ta chibia kai sea pe porrne angla o trono ta angla o Bakro furiade ando parno ta ande lenge va sea krangura katar e palmera.
Ta sa e suechura sea pe porrne truial katar o trono ta katar e ppure ta e star zivotura; ta die changa angla o trono ta lengo mui reslo llik pe ppuv, ta blagosisarde e Devle
soke o Bakro kai si po maskaral katar o trono, ka avel lengo chobano ta ka inllarel len kai si o pai o llundo, Ta o Del ka kosel sa e ausa katar lenge akka.”