Chatawhcha vâlyuhchâpa papangawhna ta a chiahmie vaw tô ta, awhsi avâ tawhta alei lâ a tlapa hmô na ta, leichiepa khaohtlô pahyna châhbi a hnohta piepa châ ta.
Leichiepa khaohtlô cha pahy ta, leichiepa khaohtlô tawhna chata patisana meikhuh ru ngaitapa a lyupa meikhuh kaw pua ta, leichiepa khaohtlô meikhuh vâna chata noh nata aruapa cha vaw zoh ha ta.
Ama khi liata Khazohpa chahnaona a hnei leipa chyhsazy tah leipa ta cha, alei liata sibiepazy, tho hrohpa kheihawhpa rai nata thokô kheihawhpa rai parao lei awpa ta chhopa ama châ.
Ama khi liata Khazohpa chahnaona a hnei leipazy cha thla pangawh chhôh pasa pataosa awpa ta khawsuzy cha pasaipa châ ei ta, ama thie awpa deikua pasaipa châ veih ei. Ama pasasanazie cha râhcha-ia ta chyhsa sie ta a pasasapa hawhta a châ.
Khawsuzy alânazie cha adyuhna châta pachhuahpanohpa arâzy hawhta ama châ. Ama luhzy liata ngôh lakho lyupa a kho ei ta, ama hmia cha chyhsapa hmia a lyu.
Thua chachôhna vyhphao a lyupa chachôhna vyhphao hnei ei ta, ama mathlaw chakhypa pyu cha, adyuhna lâ a râ ngâpa talailih hluhpi nata arâ hluhpi pyu hawhta a châ.
He he arâzy nata a kiahtuhpazy kyh liata aluahna ta ei hmôpazy a châ: Mei nata saphai lô nata kaih hawhpa chachôhna vyhphaozy hnei ei ta, arâ luhzy cha chakeibarôhneipa luhzy lyu ta, ama pakah tawhta mei nata meikhuh nata kaihzy a pua.
Arâzy hmotaotheina cha ama pakah liata nata ama chaolahmei liata y ta, ama chaolahmeizy cha parihzy hawhta châ ta, luhzy hnei ei ta, cha chata chyhsa ama pasasa tyh.
Khizaw chyhsa hropa, cha potlanazy ta a thie leipazy ta ama ku ta taopazy amâ chhypa tawhta ro khoh to veih ei. A hmô thei leipa, a thei thei leipa nata a sie thei leipa ngôh nothlahpa, tâkâ nothlahpa, dawh nothlahpa, alô nothlahpa nata tho nothlahpa achhyna nata ahripazy achhyna bâsai hlei veih ei.